හැටේ දශකයේ ජනප්‍රිය සංගීත කණ්ඩායමක් වූ ‘බීට්ල්ස්’ සංගීත කණ්ඩායම හා සමාන ජනප්‍රියත්වයක් හිමි කරගත් ද බීච් බෝයිස් සංගීත කණ්ඩායමේ නිර්මාතෘවරයා වන 20 වැනි ශත වර්ෂයේ බිහි වූ අතිදක්ෂ විශිෂ්ට සංගීතවේදියෙකු ලෙස සැලකෙන ඇමරිකානු ජාතික බ්‍රයන් විල්සන් ඉකුත් බදාදා (10දා) මියගොස් තිබේ. මියයනවිට 82 වන වියෙහි පසුවූ බ්‍රයන් සංගීතවේදියා ගායකයෙකු මෙන්ම ගී පද රචකයෙකු හා සංගීත තැටි නිෂ්පාදකයෙකු වශයෙන් ලොව පුරා ජනප්‍රියව සිටි අතර ඔහු ලොව පුරා අතිශයින් ජනප්‍රිය වූ ගීත රැසක් දායාද කර ඇත්තේ සිය දකුණු කන සම්පූර්ණයෙන් බිහිරි වී තිබියදී බව විදෙස් මාධ්‍ය පවසයි. 1942 වසරේ ජුනි 20 වැනිදා ඇමරිකා එක්සත් ජනපදයේ කැලිෆෝනියා ප්‍රාන්තයේ ඉන්ගල්වුඩ් හි උපත ලැබූ බ්‍රයන් විල්සන් සංගීතවේදියා ද බීච් බෝයිස් සංගීත කණ්ඩායම පිහිටුවාගෙන ඇත්තේ 1961 වසරේදීය. ඒ සිය සහෝදරයන් දෙදෙනා වන ඩෙනිස් හා කාල් විල්සන් සිය මස්සිනා වන මයික් ලව් හා මිතුරා වන අල් ජාඩයින් සමගින.ි
සිය සංගීත කණ්ඩායම වෙනුවෙන් ගීත 260කට අධික සංඛ්‍යාවක් රචනා කර ඇති බ්‍රයන් විල්සන් ගීත සිය ගණනක් ගායනා කර තිබේ. මත්ද්‍රව්‍යවලට ඇබ්බැහි වීම හේතුවෙන් වරින්වර විවිධ ගැටලුවලට මුහුණ පෑ බ්‍රයන් විල්සන් ඉකුත් වසරේදී සිය අවසන් සංගීත ප්‍රසංගයට සහභාගී වී තිබිණි. ඩිමෙන්ෂියා රෝගයෙන් පෙළීම හේතුවෙන් ඔහුගේ පුද්ගලික කටයුතු වෙනත් අයෙකුට නිත්‍යානුකූලව පැවරීමට අධිකරණය විසින් පියවර ගෙන තිබිණි.
