ලෝක බඩගිනි දර්ශකයට අනුව ශ්‍රී ලංකාවේ ජනගහනයෙන් 4.1%ක් මන්දපෝෂණයට ගොදුරුව ඇතැයි, විශේෂඥ වෛද්‍ය චමල් සංජීව මහතා සඳහන් කරයි.
එම දර්ශකයට අනුව ශ්‍රී ලංකාව 56 වැනි ස්ථානයේ රැඳී සිටින බවත්, මෙරට වයස අවුරුදු පහට අඩු දරුවන් අනතුරින් 12.6%ක් වයසට සරිලන උස නොදරන බවත් අවුරුදු පහට අඩු දරුවන් අතුරින් 10.8%ක් වයසට සරිලන බර නොදරන බවත් පවසන විශේෂඥ වෛද්‍යවරයා, මෙරට දරුවන් අතුරින් සියයට දශම හයක්, වයස අවුරුදු 05 සම්පූර්ණ වීමට ප්‍රථම මියයන බවද කියති.
ශ්‍රී ලංකාවේ ආර්ථික උද්ධමනය සහ ආහාර සඳහා වන උද්ධමනය ඉහළ යෑමේ ප්‍රතිඵලයක් ලෙස නැවත වතාවක් ග්‍රාමීය ප්‍රදේශවල ජීවත්වන දරුවන් මන්දපෝෂණයට ගොදුරු වීමේ ඉහළ අවදානමක් පවතින බව අදාළ වාර්තා මගින් පෙන්වා දී ඇතැයි ද වෛද්‍යවරයා පවසයි.
එමෙන්ම අවසන් වරට නිකුත්ව ඇති ලෝක බැංකු වාර්තාවට අනුව මෙරට ජනගහනයෙන් හතරෙන් එකකට ආසන්න ප්‍රමාණයක් දරිද්‍රතා සීමාවන්ට ළඟා වී ඇත. ආදායම අහිමි වීම, රැකියා අවස්ථා නැතිවීම, වියදම් වැඩිවීම, ආහාර, අධ්‍යාපනයේ සහ නිසි සෞඛ්‍යය සඳහා මාසිකව වියදම් කළ යුතු මුදල වැඩිවීමත් සමග පවුල් අතුරින් සැලකිය යුතු ප්‍රමාණයක් නිසි පරිදි පෝෂ්‍යදායී ආහාර ලබාගැනීමෙන් ඈත්ව ඇතැයි ද විශේෂඥ වෛද්‍ය චමල් සංජීව මහතා වැඩිදුරටත් කීය.
සුජීව තත්සර
