තායි භික්‍ෂූන් වහන්සේ හැත්තෑනමක් ශ්‍රී ලංකාවට වැඩම කරති

අද සිරිපා වඳින්න යති

ශ්‍රී ලංකාව සහ තායිලන්තය අතර රාජතාන්ත්‍රික සබඳතා වසර 70ක් ඉක්මවා පැවතීමත්, මෙරට සැමරීමට සූදානම් වන පොසොන් උත්සවයටත් සමගාමීව පැවැත්වීමට නියමිත පාද යාත්‍රාවකට සහභාගීවීම සඳහාත් තායිලන්තයේ වට්ඛාන්චනග් බෞද්ධ විහාරස්ථානයේ විහාරධිපති ප්‍රාධිකාන් සුරපස් විභාතෝ හිමි ඇතුළු භික්ෂුන් වහන්සේලා 70 නමක් ඊයේ (06 දා) පස්වරුවේ කටුනායක ගුවන්තොටුපොළ වෙත පැමිණියහ.

මෙම භික්ෂුන් වහන්සේලා පිරිස 07 දා ශ්‍රී පාද වන්දනා චාරිකාවේ නිරත වීමෙන් අනතුරුව, 10 සිට කතරගම කිරිවෙහෙර සිට අරඹන “ සියම් දහම් පාද යාත්‍රාව” පවත්වා, එළඹෙන 07/02 දින වැලිවේරිය පාහියන් බෞද්ධ සංස්කෘතික මධ්‍යස්ථානය වෙත ළඟා වීමට නියමිතය.

මෙම බෞද්ධ භික්ෂුන් වහන්සේලා පිරිස 06 දා පස්වරුවේ පැමිණි අතර මෙම පිරිස පිළිගැනීම සඳහා ශ්‍රී ලංකා ප්‍රවර්ධන කාර්යාංශයේ සහකාර අධ්‍යක්ෂ නිතිනි සේනානායක මහත්මිය ඇතුළු පිරිසක් කටුනායක ගුවන්තොටුපොළ වෙත පැමිණ සිටියහ.

කටුනායක – ටී. කේ. ජී. කපිල