පැමිණිලි දෙකම අල්ලස් කොමිසමෙන්
වසර දෙකක සිය වැටුපෙන් හා ඉපැයීම්වලින් උපයාගත් නොහැකි රුපියල් කෝටි 15කට අධික මුදලක් යොදවා සුඛෝපභෝගි වාහන හා දේපළ මිලදී ගැනීම් චෝදනාව යටතේ අල්ලස් හෝ දූෂණ විමර්ශන කොමිෂන් සභාව විසින් හිටපු කම්කරු හා මහජන සම්බන්ධතා ඇමැතිවරයකු වූ මර්වින් සිල්වා මහතාට එරෙහිව පවරා ඇති නඩුවට අදාළව අධි චෝදනා ඊයේ ඔහුට භාර දෙන ලදී. අධිචෝදනා පත්‍රය භාරදීමෙන් අනතුරුව ඇපමත මුදාහැරීමට කොළඹ ප්‍රධාන මහාධිකරණ විනිසුරු ආදිත්‍ය පටබැඳිගේ මහතා ඊයේ (06) නියෝග කළේය.
කම්කරු හා මහජන සම්බන්ධිකරණ ඇමැතිවරයා ලෙස කටයුතු කළ වසර දෙක තුළ එනම් 2010.03.31 හා 2012.03.31 කාලයේදී සිය වැටුපෙන් හා ඉපැයිම්වලින් උපයාගත නොහැකි රුපියල් කෝටි 15කට අධික මුලක් යොදවා ඇති සුඛෝපභෝගි වාහන, ඉඩකඩම් ඇතුළු දේපළ මිලදී ගැනීම ඇතුළු චෝදනා යටතේ අල්ලස් හෝ දූෂණ විමර්ශන කොමිෂන් සභාව විසින් පවරා තිබූ නඩුව ඊයේ (06) කැඳවිණි. මහෙස්ත්‍රාත් අධිකරණය විසින් වෙනත් චෝදනාවක් යටතේ රක්ෂිත බන්ධනාගාරගත කර සිටින එම විත්තිකරු මහාධිකරණය නිකුත් කළ සිතාසි නියෝග අනුව බන්ධනාගාර නිලධාරීන් විසින් ඊයේ (06) මහාධිකරණයට ඉදිරිපත් කර තිබිණි.
එලෙස අයථා ලෙස හෝ අල්ලස් ලෙස උපයාගත් මුදලින් හා මුදල් නොවන දේපළවල හිමිකාරීත්වය දැරීම මගින් අල්ලස් පනත යටතේ ගැනෙන වැරදි සිදුකර ඇතැයි චෝදනා ගොනු කර තිබූ එම නඩුව ලබන ජූලි 11 වැනිදා යළි කැඳවීමට දින නියම කළ ප්‍රධාන මහාධිකරණ විනිසුරු ආදිත්‍ය පටබැඳිගේ මහතා විත්තිකරු රුපියල් ලක්‍ෂ 50 බැගින් ශරීර ඇප දෙකක් මත මුදාහැරීමට නියෝග කළේය.
මේ අතර කූට ලේඛන සකස් කිරීමේ චෝදනාවකට පවරා ඇති නඩුව යටතේ රක්ෂිත බන්ධනාගාරගත කර සිටීම නිසා තවදුරටත් බන්ධනාගාර ගතවීමට ඇප ලැබුණු මර්වින් සිල්වා මහතාට සිදුවිය.
ඒ.ජේ.ඒ. අබේනායක
