සිය අමාත්‍ය ධුර කාලයේදී තනතුරුවලට අයථා ලෙස සිය හිතවතුන් බඳවා ගැනීම් සිදුකිරීම ඒ සඳහා නිලධාරීන්ට බලපෑම් කිරීම ඇතුළු චෝදනා 11ක් යටතේ හිටපු ඇමැතිනි චන්ද්‍රානි බණ්ඩාර මහත්මියට අධිචෝදනා භාර දීම ඊයේ (06) සිදුවිය. කොළඹ ප්‍රධාන මහාධිකරණ විනිසුරු ආදිත්‍ය පටබැඳිගේ මහතා ඉදිරියේදී මෙම අධිචෝදනා භාරදීම සිදුකරන ලදී.
අධිචෝදනා භාර දීමෙන් අනතුරුව විත්තිකාරිය රුපියල් 10,000ක් බැගින් වූ ශරීර ඇප දෙකක් මත මුදාහැරීමට ද ප්‍රධාන මහාධිකරණ විනිසුරුවරයා නියෝග කළේය. මහාධිකරණය විසින් නිකුත් කළ සිතාසි නියෝග අනුව විත්තිකාර චන්ද්‍රානි බණ්ඩාර මහත්මිය අධිකරණය හමුවේ පෙනී සිටියාය.
යහපාලන රාජ්‍ය සමයේ එනම් 2019.01.14 හා 2019.01.31 කාලය අතරතුරදී කාන්තා, ළමා කටයුතු හා වියළි කලාප අමාත්‍යවරිය ලෙස කටයුතු කරමින් සිටියදී සිය හිතවතකු වන එච්.එම්. චන්ද්‍රවංශ නමැත්තා වියළි කලාප ව්‍යාපෘතියේ අධ්‍යක්ෂ ධුරයට පත්කිරීම හා ඇගේ තවත් හිතවතුන් පිරිසක් එම ව්‍යාපෘතියේ ව්‍යාපෘති කළමනාකරු, ව්‍යාපෘති නිලධාරී හා ව්‍යාපෘති පරිසර නිලධාරි යන තනතුරුවලට පත්කිරීම සඳහා අමාත්‍යාංශයේ ලේකම්වරයා පෙළඹවීම ඇතුළු චෝදනා 11ක් යටතේ අල්ලස් හෝ දූෂණ විමර්ශන කොමිෂන් සභාව පසුගිය 20 වැනිදා මහාධිකරණය හමුවේ එම නඩුව පවරා තිබිණි. සිය අමාත්‍ය ධුරයේ බලය අයුතු ලෙස යෙදවීමෙන් අල්ලස් හෝ දූෂණ විමර්ශන පනත යටතේ ගැනෙන දූෂණය නමැති වරද සිදුකළේ යැයි එමඟින් චෝදනා නඟා තිබිණි.
ඒ.ජේ.ඒ. අබේනායක
