ඇතැම් මැති ඇමැති බලපෑම් නිසා රාජ්‍ය ආයතනවල සභාපති එක දිගට ඉල්ලා අස්වෙන තැනට රට පත්වීම සිදු කළ වෙනස දැන් තමා ප්‍රශ්න කරන බව මහරගම නව ජනතා පෙරමුණේ නායක සුගීශ්වර බණ්ඩාර මහතා පැවැසීය.
මහරගම නව ජනතා පෙරමුණ පක්ෂ කාර්යාලයේ දී පැවැති මාධ්‍ය හමුව සඳහා පක්ෂ නායක සුගීශ්වර බණ්ඩාර නුවර දිස්ත්‍රික් නායක සමන්ත ප්‍රේමරත්න, කොලොන්නාව ආසන ප්‍රධාන සංවිධායක අජිත් කුමාර, කොළඹ දිසා සභාවේ නියෝජ්‍ය ලේකම් දර්ශනී ඉහෙපෙරුම කොළඹ දිසා සභාවේ භාණ්ඩාගාරික චන්ද්‍රලතා පරණවිතාන කොලොන්නාව කොට්ඨාස සංවිධායක අමරවීර, දෙහිවල උද්‍යාන කොට්ඨාස සංවිධායක නදීෂා යන මහත්ම මහත්මීන් ද සහභාගි වූහ.
මෙහිදී අදහස් දක්වමින් සුගීශ්වර බණ්ඩාර මහතා,
සමහර ඇමැතිවරුන් සිදු කළ බරපතළ ප්‍රකාශය තුළ වසර 76 ක් පුරාවට කිසිදු රජයක් සිදු නොකළ පරිදි දැඩි දේශපාලන මැදිහත්වීම් අපිට දකින්නට තිබෙනවා.
ඇමැතිවරයකුගේ ක්‍රියා කලාපය නිසා ලංකා පැල්වත්ත සීනි සමාගම ඈවර වෙමින් යනවා. අපි දුටුවා ඊයේ පැල්වත්ත සීනි සමාගමේ ප්‍රධාන විධායක නිලධාරි නුවන් ධර්මරත්න මහතා ඉල්ලා අස්වෙනවා. ඔහු ඉල්ලා අස්වීම පිළිබඳව සමාජයේ විශාල කතාබහක් ඇති වෙමින් පවතිනවා. මොකද මේ මාලිමා ආණ්ඩුව බලයට ගෙන ඒමට දරදිය ඇදපු මාලිමා ආණ්ඩුවේ සභාපතිවරුන් එක පිට ඉල්ලා අස්වෙනවා. ගමනා ගමන මණ්ඩලයේ සභාපතිවරුන් 03 දෙනෙක් ඉල්ලා අස් වුණා. විදුලිබල මණ්ඩලයේ සභාපතිතුමන් ඉල්ලා අස්වුණා. පැල්වත්තේ සීනි සමාගමේ සභාපතිතුමා ඉල්ලා අස්වුණා. පසුව විධායක අධ්‍යක්ෂවරයා ඉල්ලා අස්වුණා.
දැන් උත්සාහ කරන්නේ පැල්වත්ත සීනි සමාගම පාඩුයි, සීනි ආනයනය කිරීම වාසි දායක යැයි පවසා පැල්වත්තේ කර්මාන්ත ශාලාව තුළ බඩඉරිඟු වගා කිරීමටයි. මෙලෙස සිදු වුවහොත් දේශීය සීනි කර්මාන්ත උක් කර්මාන්තය මෙරටින් තුරන් වී යනු නියතය. රටට අබසරණයි යැයි අපට ප්‍රකාශ කිරීමට සිදුවේ යැයි කීය.
