දීර්ඝ කාලයක් පුරා ක්ෂේත්‍රයේ රැඳීසිටිමින් තම කුලුඳුල් නිර්මාණය ලෙසින් ‘අක්ෂි’ ටෙලි නාට්‍ය ඉදිරිපත් කර ප්‍රේක්ෂක ආකර්ෂණය දිනා ගනිමින් පසුවදී ‘මේන් කැරැක්ටර්’ හා ‘වීදුරු තිර’ පුංචි තිරයට රැගෙන ආ ශාන් ජයරත්නගේ දෙවැනි සිනමා නිර්මාණය ‘සරා සුසුම්’ චිත්‍රපටයේ පසු නිෂ්පාදන කටයුතු මේ දිනවල සිදුවෙමින් පවතී. විදේශගතව සිටි එෂාන් හා තම රූමත් බිරිඳ ටාෂි සමගින් යළි මව්බිමට පැමිණෙන්නේ, එෂාන්ට විධායක ශ්‍රේණියේ රැකියා අවස්ථාවක් උඩරට ප්‍රදේශයෙන් ලැබීම හේතුවෙනි. ටාෂිගේ කැමැත්ත මත එක්තරා හුදෙකලා කඳු මුදුනක පිහිටි බංගලාවක් මොවුන් කුලී පදනම මත ලබාගනී. එම බංගලාවට ආ දිනයේ පටන් සිදුවන්නේ ඔවුන් කිසිසේත් අපේක්ෂා නොකළ අන්දමේ සිදුවීම් දාමයකි. ත්‍රාසය, කුතුහලය හා භීතිය කැටිකොට ගත් මෙහි ශලනි තාරකා, අඛිල ධනුද්ධර, දිනිති වල්ගමගේ, මයුර කාංචන, අමිල කරුණානායක, චතුර රාජපක්ෂ, ලක්ෂාන් වත්තුහේවා, ප්‍රදීප් මනවඩුගේ, ධනංජි තාරුකා, අශෝක සේපාල ඇතුළු පිරිසක් රංගනයෙන් එක්වී ඇත. ලක්ෂාන් වත්තුහේවා තිර රචනයෙන් ද කුලරුවන් ගමගේ කැමරා අධ්‍යක්ෂණයෙන් හා ආලෝකකරණයෙන් ද සහාය අධ්‍යක්ෂණයෙන් තරිඳු ආරච්චිගේ, නිෂ්පාදන සැලසුම්කරණයෙන් ශලනි තාරකා, නිෂ්පාදන සම්බන්ධීකරණයෙන් ධනංජි තාරකා, අංග රචනයෙන් මනනුවන් රූපසිංහ, සංගීත අධ්‍යක්ෂණයෙන් විහඟ මුතුතන්ත්‍රිගේ, වර්ණ සංයෝජනයෙන් ආනන්ද බණ්ඩාර, සංස්කරණයෙන් ගිසාන් ප්‍රභාත් තෙන්නකෝන්, ශබ්ද පරිපාලනයෙන් ශසික රුවන් මාරසිංහ, කලා අධ්‍යක්ෂණයෙන් රුවන් මලිත් පීරීස් හා ඩිලාන් රොෂාන් නිෂ්පාදන කළමනාකරණයෙන් එක්වී ඇති “සරා සුසුම් ” සිනේ මැජික් ප්‍රඩක්ෂන් වෙනුවෙන් ශෙරාන් ජයසිංහ විසින් නිෂ්පාදනය කර ඇත.
ඇන්ටන් ජේ. ප්‍රනාන්දු
