වෙළෙඳපොළ තුළ අලෙවි කෙරෙන සමෙහි ආලේප කිරීමට භාවිත කරන ක්‍රීම් වර්ග හා ලෝෂන් වර්ග රැසක සාම්පල පරීක්‍ෂා කර ලබාගත් දත්ත වාර්තාවන්ට අනුව ඒවායෙහි ශරීරයට අහිතකර බැර ලෝහ ප්‍රමාණයන්, අනුමත ප්‍රමාණය ඉක්මවා ඇති බව තහවුරු වී ඇතැයි පාරිභෝගික කටයුතු පිළිබඳ අධිකාරිය පවසයි.
ඒ අනුව අදාළ ක්‍රීම් හා ලෝෂන් වර්ග මිලදී ගැනීමේදී සිය අධිකාරිය ප්‍රකාශයට පත්කර ඇති බැර ලෝහ ප්‍රමාණයන් ඉක්මවා ඇති භාණ්ඩ මිලදී ගැනීමෙන් වළකින ලෙස එම අධිකාරිය ජනතාවගෙන් ඉල්ලා සිටී.
එම අධිකාරිය විසින් ගැසට් පත්‍ර මගින් අදාළ ක්‍රීම් වර්ග සහ ලෝෂන් වර්ගවල අන්තර්ගතව තිබිය යුතු බැර ලෝහ පිළිබඳව දැනුවත් කර ඇති බැවින් එම ප්‍රමාණයන් ඉක්මවා ඇති අදාළ ද්‍රව්‍ය අලෙවි කරනු ලබන වෙළෙඳුන්ට එරෙහිව නීතිමය පියවර ගන්නා බවද අධිකාරිය පවසයි.
මේ පිළිබඳව ‘දිවයින’ ට ඊයේ (03 දා) අදහස් දැක්වූ පාරිභෝගික කටයුතු පිළිබඳ අධිකාරියේ අධ්‍යක්‍ෂ, මාධ්‍ය අසේල බණ්ඩාර මහතා මෙසේ පැවසීය.
“සමෙහි ආලේප කිරීමට භාවිත කරනු ලබන ක්‍රීම් වර්ග සහ ලෝෂන් වර්ග පිළිබඳව ජනතාවගේ දැනුම අල්පයි. අපි නිරන්තරයෙන් මේ පිළිබඳව දැනුවත් කරනවා. නමුත් සමාජ මාධ්‍ය ඔස්සේ ඔන්ලයින් ගනුදෙනු කරමින් මේ නිෂ්පාදන අලෙවි කරන්නන් හරහා භාවිතයට නුසුදුසු ශරීරයට අහිතකර බැර ලෝහ අඩංගු ක්‍රීම් සහ ලෝෂන් අලෙවි කරමින් පවතිනවා. වෙළෙඳනාමය ලේබලය උසස් බව ආනයනය කළ හොඳම ද්‍රව්‍ය කියලා තමයි මේවා ජනතාවට අලෙවි කරන්නේ.
මෙවැනි ද්‍රව්‍ය අලෙවි කරනු ලබන කූඨ වෙළෙඳුන්ට එරෙහිව නිරතුරුව වැටලීම් සිදු කරමින්, ඔවුන්ට නීතියෙන් දැඩි දඬුවම් ලබාදීමටත් අපි ක්‍රියා කරනවා.
සුජීව තත්සර
