පාස්කු ප්‍රහාරයේ චූදිතයන් නීතිය හමුවට ගෙන ඒම කඩිනම් කරන ලෙස අගරදගුරු පදවි ජනසන්නිවේදන අධ්‍යක්ෂ ජූඩ් ක්‍රිෂාන්ත ප්‍රනාන්දු පියතුමන් ජනාධිපතිවරයා ඇතුළු රජයෙන් ඉල්ලා සිටියේය.
පාස්කු ප්‍රහාරය සම්බන්ධයෙන් රජය පත්වීමේදී ලබාදුන් පොරොන්දු යම් ආකාරයෙන් ඉටුකරමින් අලුත් පරීක්ෂණ ද සිදු කළත්, චූදිතයන් නීතිය හමුවට පැමිණවීම ප්‍රමාදව ඇතැයි මාධ්‍ය අමතමින් පියතුමා පැවසීය.
“යටගහලා තිබුණු පරීක්ෂණ සිදුකිරීමට මේ රජය කටයුතු කළා. එම පරීක්ෂණ ගැන අපි සෑහීමකට පත්ව සිටියත්, වින්දිතයන්ට සාධාරණය කිරීමට චූදිතයන්ට දඬුවම් ලබාදිය යුතුයි.
අපි පාස්කු චූදිතයන් නීතිය හමුවට කැඳවා දඬුවම් ඉල්ලන්නේ රටේ පවතින ජරාජීර්ණ දේශපාලන සංස්කෘතිය වෙනස්කළ යුතු නිසා. කෙනෙකු මරලා හරි තමන් බලයට පත්ව, එම මරණ අමතක කර ගෙනගිය දේශපාලන ගමන දැන් වෙනස් විය යුතුයි” යැයි ජූඩ් ක්‍රිෂාන්ත ප්‍රනාන්දු පියතුමා වැඩිදුරටත් කියා සිටියේය.
සුජීව තත්සර
