යුක්රේනයට එරෙහිව දිගින් දිගටම ප්‍රහාරයන් එල්ල කරමින් එරට සමග සටන් විරාමයක් ඇතිකරගැනීම ප්‍රතික්ෂේප කරමින් සිටින රුසියානු ජනාධිපති ව්ලැදිමීර් පුටින් මේ වන විට ගින්දර සමග සෙල්ලම් කරමින් සිටින බව ට ඇමරිකානු ජනාධිපති ඩොනල්ඩ් ට්‍රම්ප් විසින් චෝදනා කර තිබේ. ඇමරිකානු ජනාධිපතිවරයා විසින් රුසියානු ජනාධිපතිවරයා වෙත අලුතින්ම චෝදනා ඉදිරිපත් කර ඇත්තේ වසර තුනකට පෙර රුසියාව විසින් යුක්රේනය ආක්‍රමණය කිරීමෙන් පසු ප්‍රථම වරට රුසියානු හමුදා විසින් ඊසානදිග යුක්රේනය වෙත දැවැන්ත හා මාරාන්තික ඩ්‍රෝන යානා හා මිසයිල ප්‍රහාරයන් එල්ල කිරීමට පියවර ගෙන තිබීම හේතුවෙනි.
මාධ්‍යයට අදහස් දක්වමින් ඇමරිකානු ජනාධිපති ට්‍රම්ප් පවසා ඇත්තේ “තමා නොසිටින්න රුසියාවේ බොහෝ නරක දේවල් සිදුවීමට ඉඩ තිබූ බව පුටින් ජනාධිපතිවරයාට තේරුම් ගොස් නැත. එය ඉතා නරක දෙයක්. ඔහු ගින්දරත් සමග සෙල්ලම් කරමින් සිටිනවා” යනුවෙනි.
ට්‍රම්ප් ජනාධිපතිවරයා විසින් රුසියානු ජනාධිපති පුටින්ට එරෙහිව සිදු කර ඇති ප්‍රකාශය සම්බන්ධයෙන් අදහස් දක්වමින් රුසියාවේ ඉහළ පෙළේ ආරක්ෂක නිලධාරියෙකු වන දිමිත්‍රි මෙඩ්වඩේව් පවසා ඇත්තේ “මා දන්නේ එකම ඉතාම නරක දෙයක් ගැන පමණයි. එය නම් තුන්වැනි ලෝක යුද්ධයක් ඇති වීමයි. ට්‍රම්ප් ජනාධිපතිවරයා එය වටහා ගනු ඇතැයි සිතනවා” යනුවෙනි. මේ අතර රුසියානු හමුදා විසින් යුක්රේනයේ නගර වෙත දැවැන්ත ඩ්‍රෝන යානා හා මිසයිල ප්‍රහාරයන් එල්ල කරමින් ඊසානදිග යුක්රේනයේ වැදගත් ජයග්‍රහණයන් ලබා ගෙන ඇති බව විදෙස් මාධ්‍ය පවසයි.
