ඩුබායි පැන්න කුඩු කල්ලියක වැඩක්
කුලී ඝාතකයන් දෙදෙනකු ඇවිල්ලා
කඳාන නගර මධ්‍යයේ දෙනෝදාහක් බලා සිටියදී හිටපු ඇමැති මංගල සමරවීර මහතාගේ පෞද්ගලික ලේකම්වරයාට වෙඩි තබා බරපතළ තුවාල කර ඔහුගේ මස්සිනා ඝාතනය කර ඇත්තේ ඩුබායි රාජ්‍යයේ සැඟවී සිටින කඳානේ ප්‍රධාන පෙළේ මත්ද්‍රව්‍ය ජාවාරම් කල්ලියක් විසින් බව විමර්ශනවලින් හෙළි වී ඇත.
ඊයේ (03 වැනිදා) කඳාන නගර මධ්‍යයේ පිහිටි පොදු වෙළෙඳ සංකීර්ණය ඉදිරිපිටදී ජීප් රථයකින් ගමන් කරමින් සිටි හිටපු ඇමැති මංගල සමරවීරගේ පෞද්ගලික ලේකම් සමීර මනහර හෙවත් වැලි සමීර සහ ඔහුගේ මස්සිනා වූ උපාලි කුලවර්ධන නමැත්තා පාතාල කුලී ඝාතකයන්ගේ ප්‍රහාරයට ලක් වූහ.
ටී 56 අවියක් රැගෙන යතුරුපැදියකින් පැමිණි කුලී ඝාතකයන් දෙදෙනකු විසින් වැලි සමීර ගමන්ගත් වෙසල් වර්ගයේ ජීප් රථයට හතර පැත්තටම වෙඩි ප්‍රහාර එල්ල කර ඇත.
සිද්ධිය වන අවස්ථාවේ කඳාන නගර මධ්‍යයේදී දෙනෝදාහක් දෙනා බලා සිට ඇති අතර ඔවුහු දැඩි ලෙස භීතියට පත්ව සිටියහ.
වැලි සමීර සහ ඔහුගේ මස්සිනා කඳාන ප්‍රදේශයේ පිහිටි කා වර්ධන මධ්‍යස්ථානයක් වෙත ගොස් ආපසු සිය නිවස බලා යමින් සිටියදී මෙම ප්‍රහාරයට ලක්විය.
ඝාතකයන් කායවර්ධන මධ්‍යස්ථානය ආසන්නයේ සිට ම ජීප් රථය ලුහුබැඳ පැමිණ ඇති අතර කඳාන වෙළෙඳ සංකීර්ණය ඉදිරිපිටදී මෙම ප්‍රහාරය එල්ල කර තිබිණි.
ප්‍රහාරයෙන් බරපතළ තුවාල ලැබූ වැලි සමීර සහ ඔහුගේ මස්සිනා රාගම රෝහලට ඇතුළත් කර ඇති අතර එහි ප්‍රතිකාර ලබමින් සිටියදී මස්සිනා මියගොස් ඇත.
මෙම ප්‍රහාරයට හේතුව මෙතෙක් අනාවරණය වී නැත. ප්‍රහාරය එල්ල කළ කඳානේ ප්‍රධාන පෙළේ මත්ද්‍රව්‍ය ජාවාරම් කරන කල්ලියක ප්‍රධානින් තිදෙනකු ඩුබායි රාජ්‍යයේ සැඟවී සිටින බවට තොරතුරු පොලිසිය වෙත ලැබී තිබේ.
මෙම මත්ද්‍රව්‍ය ජාවාරම්කරුවන් පාතාල කුලී ඝාතකයන් දෙදෙනකුට ලබාදුන් මුදල් කොන්ත්‍රාත්තුවක් මත මෙම ප්‍රහාරය එල්ල වී ඇති බව විමර්ශනවලින් හෙළි වී ඇත.
ප්‍රහාරය එල්ල කර පලාගිය කුලී ඝාතකයන් සොයා කඳාන පොලිසිය පෑලියගොඩ අපරාධ කොට්ඨාසය ඇතුළු පොලිස් කණ්ඩායම් 4ක් විමර්ශන පවත්වාගෙන යයි.
ප්‍රහාරයට හේතුව මත්ද්‍රව්‍ය ආරවුලක් ද එසේත් නැත්නම් පෞද්ගලික ආරවුලක් ද යන්න මෙතෙක් හෙළි වී නොමැත.
දිවංගත ඇමැති මංගල සමරවීරගේ පෞද්ගලික ලේකම්වරයා ලෙස වැලි සමීර දීර්ඝ කාලයක් කටයුතු කර ඇත. විවහ වීමෙන් පසු මංගල සමරවීරගේ ලේකම් ධුරයෙන් ඉවත් වූ වැලි සමීර ව්‍යාපාර කීපයක් කරමින් ජීවත් වී තිබේ.
පෝට් සිටියට ගල්, වැලි සැපයීම ඇතුළු ඉදිකිරීම් ක්ෂේත්‍රයට සම්බන්ධ ව්‍යාපාර කීපයක් කරගෙන ගොස් ඇති වැලි සමීරට ඒ සඳහා උදව් උපකාර කර ඇත්තේ එවකට ඇමැතිවරයකුව සිටි මංගල සමරවීර මහතාය.
හේමන්ත රන්දුණු
