ප්‍රධාන පෙළේ මත්ද්‍රව්‍ය ජාවාරම්කරුවකු හා පාතාල කල්ලි නායකයකු යැයි කියන නඳුන් චින්තක වික්‍රමරත්න (හරක් කටා) හිටපු පොලිස් කොස්තාපල් රවිඳු සංදීප ගුණසේකර හා දිනේෂ් තරංග යන විත්තිකරුවන් තිදෙනාට එරෙහිව ගොනු කර ඇති අධිචෝදනා පත්‍රය සම්බන්ධයෙන් විත්තියේ නීතිඥවරුන් ඉදිරිපත් කළ මූලික විරෝධතා ප්‍රතික්ෂේප කළ කොළඹ මහාධිකරණ විනිසුරු සුජීව නිශ්ශංක මහතා එම නඩුව ලබන අගෝස්තු 5 වැනිදා විභාගයට ගැනීමට දින නියම කළේය.
පැමිණිල්ල වෙනුවෙන් සාක්ෂි ලබාදීමට එදින අධිකරණය හමුවේ පෙනී සිටින ලෙස දන්වා පැමිණිල්ලේ 9 වන සාක්ෂිකරුට සිතාසි යැවීමට නියෝග කළ විනිසුරුවරයා විත්තිකරුවන් සම්බන්ධයෙන් සිදුකළ ඇප ඉල්ලීම් ලිඛිතව ගොනු කරන ලෙසට ද විත්තියේ නීතිඥවරුන්ට දැනුම් දුන්නේය.
අපරාධ පරීක්ෂණ දෙපාර්තමේන්තුව භාරයේ රඳවා සිටියදී 2023.09.10 වැනිදා ආරක්ෂාවට යොදවා සිටි පොලිස් නිලධාරියකුට පහර දී පලායෑමට තැත් කිරීම, ඒ සඳහා ආධාර අනුබලදීම ඇතුළු අධිචෝදනා 22ක් යටතේ පවරා ඇති එම නඩුව තවදුරටත් ඉදිරියට පවත්වාගෙන යන්නේ ද නැතහොත් නව චෝදනා පත්‍රයක් ඉදිරිපත් කරන්නේ ද යන කරුණ නීතිපතිවරයා සමග සාකච්ඡා කොට ඉදිරියේදී අධිකරණයට දැනුම් දෙන බව නීතිපතිවරයා වෙනුවෙන් පෙනී සිටි රජයේ අධිනීතිඥ සජිත් බණ්ඩාර මහතා අධිකරණයට දැනුම් දුන්නේය.
සාක්ෂි විභාගයක් පැවැත්වීමට අධිකරණය තීරණය කොට තිබියදීත් නව අධිචෝදනා පත්‍රයක් පිළිබඳව පැමිණිල්ල කරුණු දැක්වීම විත්තිකරුවන්ට කරනා බලවත් අසාධාරණයක් බව පළමු වැනි විත්තිකරු වෙනුවෙන් පෙනී සිටි ජනාධිපති නීතිඥ කපිල වෛiරත්න මහතා කීය.
ත්‍රස්ත විමර්ශන කොට්ඨාසයේ නිලධාරීන් භාරයේ තංගල්ල පැරණි බන්ධනාගාරයේ රඳවා සිටින පළමු විත්තිකාර නඳුන් චින්තක වික්‍රමරත්න නමැත්තාට අවශ්‍ය පෑන් හා ලිපි ද්‍රව්‍ය ලබාදෙන ලෙස මහෙස්ත්‍රාත් අධිකරණය නියෝග කොට තිබියදීත් එම නියෝගය නොතකා ත්‍රස්ත විමර්ශන නිලධාරීන් කටයුතු කිරීම බලවත් අසාධාරණයක් බව ජ්‍යෙෂ්ඨ නීතිඥ ජාලිය සමරසිංහ මහතා පැවසීය.
එම විත්තිකරුට එරෙහිව විවිධ අධිකරණ හමුවේ නඩු 25ක් පමණ ඇති බැවින් එක් එක් නඩුව සම්බන්ධයෙන් නීතිඥවරුන්ට උපදෙස් දීමට ඒවා සටහන් කර තැබීමට ඇති අවශ්‍යතාවය සලකා මහෙස්ත්‍රාත් අධිකරණය එකී නියෝග ලබාදී ඇතත් මෙම අධිකරණය එවැනි නියෝගයක් සිදුකර නොමැති බැවින් පෑනක් හෝ ලබානොදෙන ලෙසට පැමිණිල්ල මෙහෙයවන රජයේ අධිනීතිඥවරයා ත්‍රස්ත විමර්ශන නිලධාරීන්ට උපදෙස් දීම සාධාරණ නඩු විභාගයකට මුහුණදීමට ඇති අයිතියට දැඩි බාධාවක් බව නීතිඥ ජාලිය සමරසිංහ මහතා අධිකරණයට පැවසීය.
තම අධිකරණය එවැනි නියෝගයක් කර නොමැති බැවින් එම නියෝග ලබාදුන් අධිකරණය හමුවේදී එම කරුණු දක්වන ලෙසට විනිසුරුවරයා විත්තියේ නීතිඥවරයාට පැවසීය. විත්තිකරුවන් දැඩි ආරක්ෂාවක් යටතේ අධිකරණයට ඉදිරිපත් කොට තිබිණි.
ඒ. ජේ. ඒ. අබේනායක
