මහජන ආරක්ෂක අමාත්‍යාංශය යටතේ ඇති දෙපාර්තමේන්තුවලට 2025 අය-වැයෙන් වෙන්වූ මූල්‍ය ප්‍රතිපාදනවලින් පොලිස් නිලධාරීන්ගේ සුබසාධන ක්‍රියාවලිය වේගවත් කිරීමටත්, පොලිසියට වාහන 200ක් මිලදී ගැනීමට සහ ගොඩනැඟිලි කඩිනමින් ඉදිකර අවසන් කිරීමට කටයුතු කරන ලෙසටත් මහජන ආරක්ෂක ඇමැති ආනන්ද විජයපාල මහතා පෙරේදා (02දා) පැවැති ප්‍රගති සමාලෝචන රැස්වීමේදී උපදෙස් දී ඇත.
මහජන ආරක්ෂක අමාත්‍යාංශය යටතේ පවතින දෙපාර්තමේන්තුවලට වෙන් කරන ලද මූල්‍ය ප්‍රතිපාදනවලට අදාළ ප්‍රගති සමාලෝචන සාකච්ඡාව පාර්ලිමේන්තු කටයුතු අමාත්‍යාංශ ශ්‍රවණාගාරයේදී පෙරේදා (02දා) පැවැත්විණි.
ශ්‍රී ලංකා පොලිසියට වෙන් කරන ලද මුදල්වලට අදාළ ව්‍යාපෘති කඩිනමින් සිදුකර අවසන් කිරීමට මෙහිදී සාකච්ඡා වී තිබේ. ශ්‍රී ලංකා පොලිස් විශේෂ කාර්ය බළකායේත් පොලිස් අභ්‍යාස විද්‍යාලයේත් යටිතල පහසුකම් නැංවීම වෙනුවෙන් ද මෙවර අය-වැයෙන් වෙන්කොට ඇති මුදල් ප්‍රතිපාදන භාවිතයේ ප්‍රගතිය පිළිබඳව මෙහිදී සාකච්ඡා වී ඇත.
මෙම අවස්ථාවට මහජන ආරක්ෂක හා පාර්ලිමේන්තු කටයුතු අමාත්‍යාංශ ලේකම් රවී සෙනවිරත්න ඇතුළු අමාත්‍යාංශයේ ජ්‍යෙෂ්ඨ නිලධාරීහු රැසක් හා එක්ව සිටියහ.
චමින්ද සිල්වා
