පොරොත්තු ලේඛනය මාස 08ක් දක්වා වැඩිවෙලා
කළුතර ශික්‍ෂණ රෝහලේ හෘද කැතීටකරණ ඒකකය සති 06ක් තිස්සේ අකර්මණ්‍යව ඇතැයි රජයේ විකිරණ විද්‍යා තාක්‍ෂණවේදීන්ගේ සංගමයේ සභාපති චානක ධර්මවික්‍රම මහතා පවසයි. රෝගී පොරොත්තු ලේඛනය මාස 08 ක් දක්වා වැඩිවී ඇති බවත් ඔහු කීය.
වායු සමිකරණ පද්ධතියේ ඇතිවූ දෝෂයක් හේතුවෙන් කැතීටකරණ යන්ත්‍රය අක්‍රීය වූ බවත්, වායුසමීකරණ පද්ධතියේ දෝෂය පසුව නිවැරැදි කළත් ඉන් පසුව හෘද කැතීටකරණ යන්ත්‍රයේ දෝෂයක් හටගෙන එය අකර්මණ්‍ය වී ඇති බවත් ඔහු කීය.
විශේෂයෙන් හෘදයට රුධිරය සපයන රුධිර නාලවල (කිරීටක ධමනියේ) අවහිරතා හඳුනා
ගැනීම සඳහා සිදුකරන ඇන්ජියෝග්‍රෑම් පරීක්‍ෂණ සහ එම දෝෂ නිවැරැදි කිරීම සඳහා සිදුකරන ස්ටෙන්ට් යෙදීමේ ප්‍රතිකාරය සහ හෘද කපාටවල දෝෂ හඳුනා ගැනීම සහ ඒවා නිවැරැදි කිරීමට අදාළ ප්‍රතිකාර සිදු කිරීම මෙම හෘද කැතීටකරණ යන්ත්‍රය මගින් සිදු කරනු ලබන බවද ඔහු කීය.
ලංකාවේ රජයේ රෝහල් පද්ධතිය තුළ මෙවැනි හෘද කැතීටකරණ යන්ත්‍ර 14ක් ස්ථාපනය කර තිබෙන අතර ඉන් මහනුවර ජාතික රෝහලේ එක් යන්ත්‍රයක් දීර්ඝ කාලයක සිට බිඳවැටී ඇති අතර ක්‍රියාකාරී තත්ත්වයේ පවතින්නේ යන්ත්‍ර 12ක් බවද ඔහු කීය.
කළුතර රෝහලේ මෙම යන්ත්‍රය 2021 වර්ෂයේ ඔක්තෝබර් මාසයේ ස්ථාපනය කොට පරීක්‍ෂණ සහ ප්‍රතිකාර ආරම්භ කර තිබේ. 2024 වර්ෂයේදී මෙම යන්ත්‍රයේ වගකීම් කාලය අවසන් වූ අතර ඉන් අනතුරුව මෙම යන්ත්‍රයට අදාළ සේවා
ගිවිසුම් යාවත්කාලීන වීම සෞඛ්‍ය අමාත්‍යාංශයේ අදාළ අංශ විසින් සිදුකොට නොමැති බවද ඔහු කියා සිටී.
මෙම ගැටලුව පිළිබඳව කඩිනමින් අවධානය යොමුකොට එම යන්ත්‍රය ඉක්මනින් යථා තත්ත්වයට පත් කරදෙන ලෙසද ධර්මවික්‍රම මහතා සෞඛ්‍ය ඇමැති නලින්ද ජයතිස්ස මහතාගෙන් ඉල්ලා සිටී.
චමින්ද සිල්වා
