දේපළ සම්බන්ධ ආරවුලක් මත වසර 15කට පෙර තිස්සමහාරාම පන්නිගමුව දී කාන්තාවක ඝාතනය කිරීමේ චෝදනාවට වැරදිකරු වු පුද්ගලයකුට හම්බන්තොට මහාධිකරණ විනිසුරු ටිකිරි කේ.ජයතිලක මහතා 01 දා සවස මරණීය දණ්ඩනය නියම කළේය.
මෙලෙස මරණ දඬුවම හිමි වුයේ අංක 60/ඒ, කීර්ති ශ්‍රී රාජසිංහ මාවත, රඹුක්කන ලිපිනයේ පදිංචි යක්කලගේ ලසිත් වසන්ත කුමාර නමති 52 හැවිරිදි පුද්ගලයකුටය.
මෙලෙස ඝාතනයට ලක්ව තිබුණේ රත්නපුර, නිවිතිගල ප්‍රදේශයේ පදිංචි එක්දරු මවක වු වෙදගේ නිලානි විජේතුංග නමැති කාන්තාවකි.
විවාහ මංගල දැන්වීමක් මත චූදිත හා ඝාතනයට ලක් වූ කාත්තාව දැනහැඳිනගෙන තිබේ. ඒ අවස්ථාව වන විටත් මෙම කාන්තාවට වෙනත් විවාහයකින් දැරියක ද සිට තිබේ. දෙදෙනා දැන හැඳින ගැනීමෙන් පසු කලක් එකට ජීවත්ව සිට ඇති අතර එම කාලසීමාවේ දී එම කාන්තාවට අයත් දේපළ සම්බන්ධයෙන් චුදිත පුද්ගලයා හා එම කාන්තාව අතර ආරවුලක් ඇතිව තිබේ. දෙදෙනා අතර ඇති වූ මෙම ආරවුල මත චුදිත පුද්ගලයා විසින් මෙම කාන්තාව ඝාතනය කර ඇයගේ දෙහැවිරිදි දැරිය අලුයම වංගු 10, රක්වාන ප්‍රදේශයේ මහාමාර්ගයක දමා ගොස් තිබේ.
කොලොන්න සිට කොළඹ දක්වා ධාවනය වූ බස් රථය අලුයම 04ට පමණ රක්වාන වංගු 10 ප්‍රදේශයෙන් ගමන් කරන විට කුඩා දැරියක පාර දිගේ එනු දැක එම බස් රථයේ රියැදුරු විසින් බසය නවතා දැරිය බස්රථයට නංවාගෙන තිබේ. ඒ වන විටත් දැරිය දැඩි භීතියකින් පසුව අති අතර දැරියට මව පියා පිළිබඳව හෝ ගම පිළිබඳව කියාගත නොහැකිව තිබේ. දැරිය බස් රථ රියැදුරු විසින් රත්නපුර පොලිසියට භාරදීමෙන් පසු සිදුකළ මූලික විමර්ශනවල දී සැකකරු පිළිබඳ තොරතුරු අනාවරණය වී තිබේ. ඒ අනුව සැකකරු අත්අඩංගුවට ගෙන සිදුකළ මූලික විමර්ශනවලදී අනාවරණය වී ඇත්තේ සැකකරු දැරිය මහ මග දමා කාන්තාව ඝාතනය කර තිස්සමහාරාම
පන්නිගමුව ප්‍රදේශයේ වළ දමා ඇති බවය. සැකකරුට එරෙහිව නීතිපතිවරයා විසින් 2021. නොවැම්බර් 11 දා හම්බන්තොට මහාධිකරණය හමුවේ අධිචෝදනා දෙකක් යටතේ නඩු පවරා තිබේ. අනතුරුව පැවති දීර්ඝ නඩු විභාගයකින් මෙම දඬුවම් නියම කෙරිණි.
මරණීය දණ්ඩනය පමුණුවන තෙක් චුදිත වැලිකඩ බන්ධනාගාරයේ රඳවා තබන ලෙසට අඟුණුකොළපැලැස්ස බන්ධනාගාර අධිකාරී වරයාට නියම කෙරුණි.
මත්තල දිලීප් එන්. ජයසේකර
