සියලු මගීන්ගේ ජීවිත ආරක්ෂාව සැලකිල්ලට ගෙන 2025 අගෝස්තු 01 වැනිදා සිට අධිවේගි මාර්ගවල ගමන් කරන සියලුම වාහනවල මගීන්ට ද සැප්තැම්බර් 01 වැනිදා සිට අධිවේගී මාර්ගවල ගමන් කරන බස් රථවල සියලුම මගීන්ට ද ආසන බඳපටි පැලඳීම අනිවාර්ය කර තිබේ.
ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය බිමල් රත්නායක මහතා ඊයේ (01දා) උදේ කොළඹ මධ්‍යම බස් නැවතුම්පළේ නිරීක්ෂණ චාරිකාවකට එක්වෙමින් මේ බව සඳහන් කළේය.
මාර්ග රිය අනතුරුවලින් ජීවිත විශාල ප්‍රමාණයක් අහිමි වන බවත් එම තත්ත්වය මඟහැරීම සඳහා මෙම තීරණය ගත් බවත් අමාත්‍යවරයා කියා සිටියේය. එසේම අධිවේගී මාර්ගවල ධාවනය වන සැහැල්ලු වාහනවල පිටුපස යන අයට ද ආසන පටි පැලඳීම අනිවාර්ය වන බව ද අමාත්‍යවරයා පැවසීය.
2011 වසරේ සිට ආසන පටි පැලඳීම අනිවාර්ය කර තිබුණු අතර සැහැල්ලු වාහන සඳහා එම නීතිය තරමක් ක්‍රියාත්මක වුවත් ලොරි සහ බස් රථ එම නීතිය මඟහැර සිටි බවත් ඊයේ සිට බස් හා ලොරි රථ රියැදුරන්ට ආසන පටි පැලඳීම අනිවාර්ය වන බවත් අමාත්‍යවරයා කීය.
මෙය හුදෙක් නීතිය ක්‍රියාත්මක කිරීමක් නොවන බවත් අනතුරුවලින් සිදුවන හානිය අවම කිරීම සඳහා රජය ක්‍රියාත්මක කරන පුළුල් වැඩපිළිවෙළක එක් කොටසක් බවත් අමාත්‍යවරයා කියා සිටියේය.
ඊයේ සිට බස් රියැදුරන් ආසන පටි පැලඳීම අනිවාර්ය බව ජාතික ගමනාගමන කොමිෂන් සභාව ද මීට පෙර දැනුම් දී තිබිණි.
ප්‍රදීප් ප්‍රසන්න සමරකෝන්
