යසෝධා සමූහ ව්‍යාපාරයේ අධ්‍යක්ෂවරුන් විසින් ලියා අත්සන් කර සිය බැංකු මූලස්ථාන ශාඛාව වෙත ඉදිරිපත් කළ බවට හැඟෙන පරිදි තමන් විසින් සකස් කළ රුපියල් මිලියන 2000 අදාළ පුද්ගලික සුරැකුම් පතක් කූට ලේඛනයක් බව දනිමින්ම සත්‍ය ලේඛනයක් ලෙස මහාධිකරණයට ඉදිරිපත් කිරීමේ චෝදනාව යටතේ එක්තරා ප්‍රධාන පෙළේ රාජ්‍ය බැංකුවක සහකාර සාමාන්‍යාධිකාරිවරයකු ලෙස කටයුතු කළ විතානගේ දොන් දයානන්ද නමැත්තාට එරෙහිව නීතිපතිවරයා විසින් පවරා ඇති නඩුවේ වැඩිදුර සාක්ෂි විභාගය ලබන ඔක්තෝබර් 30 වැනිදා යළි ආරම්භ කිරීමට කොළඹ මහාධිකරණ විනිසුරු ලංකා ජයරත්න මෙනවිය ඊයේ (01දා) නියෝග කළාය.
එම නඩුව ඊයේ (01දා) කැඳවූ අවස්ථාවේදී නීතිපතිවරයා වෙනුවෙන් පැමිණිල්ල මෙහෙය වන නියෝජ්‍ය සොලිසිටර් ජනරාල්වරිය හා පැමිණිල්ලේ පළමු වැනි සාක්ෂිකාර යසසිරි කස්තුරිආරච්චි මහතා වෙනුවෙන් පෙනී සිටි ජ්‍යෙෂ්ඨ ජනාධිපති නීතිඥ තිලක් මාරපන මහතා කළ කරුණු දැක්වීම් සලකා බැලූ විනිසුරුවරිය එම නියෝගය කළාය.
2016.06.01 වැනිදා හෝ ඊට ආසන්න දිනකදී කොළඹ වාණිජ මහාධිකරණය හමුවේ විභාග වූ අංක 122/2004 දරන නඩුවේ පැමිණිල්ලේ සාක්ෂිකරුවකු ලෙස ඉදිරිපත් වී එකී කූට ලේඛනය නඩු භාණ්ඩයක් ලෙස ඉදිරිපත් කිරීමෙන් දණ්ඩ නීති සංග්‍රහයේ 459 වැනි වගන්තිය යටතේ දඬුවම් ලැබිය යුතු වරදක් සිදුකර ඇතැයි චෝදනා කරමින් 2019 වසරේදී නීතිපතිවරයා එම විත්තිකරුට එරෙහිව එම නඩුව පවරා තිබිණි. එම නඩුවේ පැමිණිල්ලේ පළමු වැනි සාක්ෂිකාර යසසිරි කස්තුරිආරච්චි මහතා අධිකරණය හමුවේ පෙනී සිටියේය. සිය සේවාදායකයා රෝග තත්ත්වයකට ගොදුරු වී ප්‍රතිකාර ලබමින් සිටියදී අධිකරණයට පැමිණ ඇති බව යසසිරි කස්තුරිආරච්චි මහතා අධිකරණයට පෙන්වා දුන්නේය. ඊයේ (01දා) දිනයේ කොළඹ වෙනත් මහාධිකරණයක් හමුවේ පැවැත්වෙන සුවිශේෂ නඩු කටයුත්තක් මෙහෙයවීමට ඇති බැවින් හා පැමිණිල්ලේ පළමු වැනි සාක්ෂිකරුගේ අයහපත් සෞඛ්‍ය තත්ත්වය සලකා එම නඩුවේ වැඩිදුර සාක්ෂි විභාගය කල්තබන ලෙස නියෝජ්‍ය සොලිසිටර් ජනරාල්වරිය අධිකරණයෙන් ඉල්ලා සිටියාය.
සුරැකුම් පත් නොමැතිව ණය ලබාගැනීමේ චෝදනාව යටතේ යසසිරි කස්තුරිආරච්චි මහතාට එරෙහිව කොළඹ වාණිජ මහාධිකරණය හමුවේ පවරා තිබූ නඩුවක් විභාගයට ගත් අවස්ථාවේදී ඔහු ලබාගත් සියලු ණය ඒ වනවිටත් ගෙවා අවසන් කර ඇති බව අදාළ බැංකුවේ ජ්‍යෙෂ්ඨ නිලධාරීන් විසින්ම විත්තිය වෙනුවෙන් පෙනී සිටි ජනාධිපති නීතිඥ තිලක් මාරපන මහතා නැඟූ හරස් ප්‍රශ්නවලට පිළිතුරු දෙමින් ප්‍රකාශ කොට තිබිණි. එම කරුණු සලකා බැලූ එවකට මහාධිකරණ විනිසුරුවරයකු ලෙස කටයුතු කළ අයි. එම්. ඉමාම් මහතා එකී චෝදනාවලින් යසසිරි කස්තුරිආරච්චි මහතාව නිදොස් කොට නිදහස් කර තිබිණි. ඒ අනුව සිදුකළ වැඩිදුර පරීක්ෂණවලට මෙම විත්තිකරු එකී මහාධිකරණයට ඉදිරිපත් කොට ඇත්තේ කූට ලෙස සකස් කරන ලද සුරැකුම් පතක් අනුව බව අනාවරණය වීම නිසා විතානගේ දොන් දයානන්ද නමැත්තාට එරෙහිව නීතිපතිවරයා එම නඩුව පවරා තිබිණි.
ඒ. ජේ. ඒ. අබේනායක
