පාස්කු ප්‍රහාරයේ සැබෑ වැරදිකරුවන් හෙළිකර යුක්තිය ඉටුකරන බවට වත්මන් රජය ලබාදුන් පොරොන්දු ඉටුකර නැහැ
ජනපති කොමිසමේ පළමු වෙළුමේ නිර්දේශ 200 ක්‍රියාත්මක නොකරන්නේ ඇයි
නීතිපති දෙපාර්තමේන්තුව ගැන ලැජ්ජයි
පාස්කු ප්‍රහාරයේ සැබෑ වැරදිකරුවන් හෙළිකර නිසි විමර්ශනයකින් පසු යුක්තිය ඉටුකරන බවට, වත්මන් රජය ලබාදුන් පොරොන්දු තවමත් ඉටුකර නැතැයි, කොළඹ අගරදගුරු මැල්කම් රංජිත් කාදිනල්තුමා චෝදනා කළේය.
ජාතික ජන බලවේග රජය විසින් ලබාදුන් පොරොන්දුව ඉටු නොකිරීම පිළිබඳව තමන් සසලව සිටින බව ද පෙරේදා (12දා) කොළඹ කොච්චිකඩේ ශාන්ත අන්තෝනි මුනිඳුන්ගේ දේවස්ථානයේ පැවති දේව මෙහෙයට එක්වෙමින් කාදිනල්තුමා සඳහන් කළේය.
මීට අවුරුදු හයකට පෙර සිදුවූ ඒ භයානක ප්‍රහාරය පිළිබඳව නිසි ලෙස සොයා ගැනීමට තවමත් අපොහොසත්ව තිබෙනවා. ඕනෑවට එපාවට, ආවාට ගියාට මෙය සිදුවෙනවා නම් අපි ඒ නැතිවුණු ජීවිතවලට කරන්නේ අගෞරවයක්.
ජනාධිපති කොමිෂන් සභා වාර්තාවේ පළමු වෙළුමේ එන දෙසීයකටත් වැඩි නිර්දේශ ක්‍රියාත්මක කිරීමට කිසිදු දේශපාලන නායකයෙක් හෝ පක්‍ෂයක් ක්‍රියාකර නැහැ. ඒ පිළිබඳව නිසි යාන්ත්‍රණයක් හෝ ආරම්භ කර නැහැ. මෙම ප්‍රහාරය පිළිබඳව කලින් දැන සිටියත්, එය වැළැක්වීමට නිල බලයෙන් වගකීම් තිබූ කිසිවක් නොකළ හිටපු ජනාධිපතිවරයකු, අගමැතිවරයකු, පොලිසියේ හා ආරක්‍ෂක අංශවල උසස් නිලධාරීන්ට මේ වාර්තාවේ නිර්දේශයන්ට අනුව නීතිපති හෝ එම දෙපාර්තමේන්තුව මේ දක්වා විiානුකූල හෝ විනයානුකූල ක්‍රියාමාර්ග ගෙන නොමැති බව ද කියන්නේ බලවත් කනගාටුවෙන්.
මේ දක්වා මේ ප්‍රහාරය සම්බන්ධයෙන් නීතිපති දෙපාර්තමේන්තුව කිසිවක් නොකර සිටීම ලැජ්ජා සහගත බව කිව යුතුයි. ඇතැම් දේශපාලකයන්ට බැලමෙහෙවරකම් කිරීමේ ආශාව තුළ හැසිරෙන මෙවැනි දෙපාර්තමේන්තු සහ රජයේ උසස් යැයි කියා ගන්නා නිලධාරීන් හැසිරෙන ආකාරය අපි හෙළි දකිනවා.
පසුගිය මැතිවරණ සමයේදී පාස්කු වින්දිතයන්ට මේ රජය පොරොන්දු වුණා වෝහාරිකව පැවැත්වෙන විමර්ශනවලට මඟපෙන්වීමට, උදව්වීමට බලතල ඇති විශේෂ අභිචෝදකවරයකු සහ කාර්යාලයක් ඇතිකරන බව. නමුත් එය ද මේ දක්වා ඉටුකර නැහැ.
ජාතික ජන බලවේගය ප්‍රතිපත්ති ප්‍රකාශය අප වෙත ඉදිරිපත් කරමින් එදා පාස්කු ප්‍රහාර විමර්ශන පිළිබඳව අපට දුන් පොරොන්දු තවමත් ඉටු නොවීමත්, ඒ සඳහා මූලික වැඩපිළිවෙළක් දියත් නොවීමත්, අප සසල කරවන්නක් බව කිව යුතු යැයි ද කාදිනල්තුමා වැඩිදුරටත් සඳහන් කළේය.
සුජීව තත්සර
