තවත් පළාත් පාලන ආයතන කීපයක බලය පිහිටුවයි

යාපනය තමිල් අරසුකච්චිට, උඩුදුම්බර සජබට,

කූපන් ඇදීමෙන් මැදගම සභාපති මාලිමාවෙන්

කැබතිගොල්ලෑව සජබට ,පඬුවස්නුවර මාලිමාවට

සර්වජන සභිකයා ඉවත් කරලා

මිනිපෙත් මාලිමාවට, නල්ලූර් බලයට ගිවිසුමක්

පැවති පළාත් පාලන මැතිවරණ ප්‍රතිඵල අනුව තවත් පළාත් පාලන ආයතන කිහිපයක බලය පිහිටුවීම ඊයේ (13දා) සිදු විය. ඒ අනුව යාපනය මහ නගර සභාවේ බලය ඉලංකෙයි තමිල් අරසුකච්චි පක්‍ෂය හිමිකර ගෙන තිබේ.

ඒ අනුව එම පක්‍ෂයේ විවේකානන්ද රාජා මදිවදනි මහත්මියට නගරාධිපති ධුරය සඳහා පැවැති ඡන්ද විමසීමේදී ඡන්ද 19ක් ලැබුණු අතර ඊ.පී.ඩී.පී. පක්‍ෂය, සමගි ජන බලවේගය හා එක්සත් ජාතික පක්‍ෂය යන පක්‍ෂවල සහය ඇයට ලැබී ඇත.

මෙම ඡන්ද විමසීමේදී ජාතික ජන බලවේගයේ මන්ත්‍රීවරුන් ඡන්දය දීමෙන් වැළකී සිට ඇත.

මේ අතර මහනුවර, උඩුදුම්බර ප්‍රාදේශීය සභාවේ බලය ඊයේ (13දා) පැවති මහා සභා රැස්වීමේදී සමගි ජන බලවේගයට හිමි විය. එම ප්‍රාදේශීය සභාවේ සභාපතිවරයා තෝරා පත්කර ගැනීම සඳහා ඡන්ද විමසීමක් පැවැති අතර එහිදී වැඩි ඡන්ද ලබාගත් සමගි ජන බලවේගයේ අජිත් විපුල බණ්ඩාර සුබසිංහ මහතා සභාපතිවරයා ලෙස තේරී පත් විය.

එසේම මැදගම ප්‍රාදේශීය සභාවේ සභාපතිවරයා තෝරා පත්කර ගැනීම සඳහා කුසපත් ඇදීමක් සිදු කළ අතර එහිදී ජාතික ජන බලවේගයේ ආර්. එම්. අජිත් පුෂ්පකුමාර මහතාට සභාපති ධුරය හිමි විය.

එම ප්‍රාදේශීය සභාවේ සභාපතිවරයා තෝරා පත්කර ගැනීම සඳහා පැවැති ඡන්ද විමසීමේදී සමගි ජන බලවේගයේ හා ජාතික ජන බලවේගයේ අපේක්‍ෂකයන් දෙදෙනාම ඡන්ද 8 බැගින් සමානව ලබා ගැනීම නිසා කුසපත් ඇදීමට සිදු විය.

එසේම ඊයේ (13දා) පැවැති කැබිතිගොල්ලෑව ප්‍රාදේශීය සභාවේ බලය හිමිකර ගැනීමට ද සමගි ජන බලවේගය ප්‍රමුඛ විපක්‍ෂයට හැකි විය. ඒ සඳහා පැවැති ඡන්ද විමසීමේදී වැඩි ඡන්දයෙන් එම ප්‍රාදේශීය සභාවේ සභාපතිවරයා ලෙස රණසිංහ වනිගසේකරලාගේ ධර්මදාස මහතා පත් විය.

මේ අතර පඬුවස්නුවර ප්‍රාදේශීය සභාවේ බලය පිහිටුවීම සඳහා ඊයේ (13දා) රහස් ඡන්දයක් පැවැත්වූ අතර එම ඡන්ද විමසීමට පෙර සර්ව ජන බලය පක්‍ෂයෙන් තේරී පත්ව තිබූ මන්ත්‍රීවරයා සභාවෙන් ඉවත් කෙරිණි. ඊට හේතුවී තිබුණේ ඔහුගේ නම ගැසට්පත්‍රය මගින් ප්‍රකාශයට පත්ව නොතිබීමයි.

ඒ අනුව පැවැති ඡන්ද විමසීමේදී ජාතික ජන බලවේගයෙන් තරග කළ මන්ත්‍රීවරයාට ඡන්ද 19ක් ලැබුණු අතර සමගි ජන බලවේගයෙන් තරග කළ මන්ත්‍රීවරයාට හිමි වූයේ ඡන්ද 18කි.

එසේම මිනිපේ ප්‍රාදේශීය සභාවේ බලය පිහිටුවීම සඳහා පැවැති ඡන්ද විමසීමේදී එක්සත් ජාතික පෙරමුණේ මන්ත්‍රීවරු දෙදෙනා ජාතික ජන බලවේගයේ සභාපති ධුර අපේක්‍ෂකයාට පක්‍ෂව ඡන්දය පාවිච්චි කිරීම නිසා එහි බලය ද ජාතික ජන බලවේගයට හිමි විය.

මේ අතර යාපනය නල්ලූර් ප්‍රාදේශීය සභාවේ බලය පිහිටුවීම සඳහා ඉලංකෙයි තමිල් අරසු කච්චි පක්‍ෂය හා දෙමළ ජාතික සංධානය පසුගිය (11දා) ගිවිසුමක් අත්සන් කර ඇත. ඒ අනුව එම පක්‍ෂ දෙකම පාලන කාලය බෙදාගෙන පාලනය කිරීමට එකඟ වී ඇත.

කමල් බෝගොඩ, දිනසේන රතුගමගේ, බඩල්කුඹුර – රවිඳු ගුණතිලක, සමන්තී වීරසේකර