එජාප සභාපතිගෙන් නිවේදනයක්
ආගමික වැඩවලදී වෛරය ක්‍රෝධය එපා
හිටපු ජනාධිපති රනිල් වික්‍රමසිංහ මහතා අනුරාධපුරයේ ප්‍රධාන ආගමික වැඩසටහන් සඳහා සහභාගී නොවූ බවට ප්‍රකාශ නිකුත් වීම ශ්‍රී ලාංකික සමස්ත බෞද්ධ ජනතාව නොමග යැවීමකි.
රනිල් වික්‍රමසිංහ මහතාගේ පරම්පරාව බුදුන් වැඩම කළ කැලණිය රජමහා විහාර පූජා භූමිය කැලෑ වැදී තිබුණු යුගයක එය ලෝකවාසී බෞද්ධ ජනතාවට වැඳ පුදා ගැනීමට හැකි වන පරිදි සකස් කොට ශාසනයට පූජා කළේද එම පරපුරයි. මිහින්තලාවේ පුද බිමේ ආලෝක පූජාව පටන් ගත්තේද රනිල් වික්‍රමසිංහ මහතාගේ මාමා වන රංජිත් විජයවර්ධන මහතා විසිනි. එපමණක් නොව අනුරාධපුර නගරයේ කෙරෙන ප්‍රධාන පිංකම් ගණනාවක්ම පටන් ගත්තේ හිටපු ජනාධිපති රනිල් වික්‍රමසිංහ මහතාගේ පවුලේ අය විසින් බව අමතක නොකළ යුතුයි. එමෙන්ම එම පරම්පරාවේම සාමාජිකයෙකු වන උපාලි විජයවර්ධන මහතාද සිතුල් පව්වේ පොසොන් උත්සවය එදා ආරම්භ කොට එයටද නායකත්වය ලබා දුන්නා. එතැනින් නොනැවතුණු එම පරම්පරාවේ රංජිත් විජයවර්ධන මහතා විජය පුවත්පත සමාගම හරහා තන්තිරිමලේ ආලෝක පූජාවද පසුකාලීනව ආරම්භ කරනු ලැබුවා. ශ්‍රී ලාංකික මහජනතාව වෙනුවෙන් මෙවන් පිංකම් කළ රනිල් වික්‍රමසිංහ මහතාගේ පවුලේ උදවිය සහ එතුමා සම්බන්ධයෙන් වැරදි ප්‍රචාර ගෙන යාම කණගාටුදායක කරුණකි.
එපමණක් නොව ඉහත සඳහන් පිංකම් මාලාවලට විටින් විට රනිල් වික්‍රමසිංහ මහතාට ආරාධනා ලැබුණු සෑම අවස්ථාවකම සහ එතුමාට කළ හැකි සෑම සේවයක්ම එතුමා ආලෝකමත් කිරීමට පියවර ගත්තේය. එපමණක් නොව විවිධ ආණ්ඩු මාරු වුවත් බෞද්ධ ශ්‍රී ලාංකික නායකයින් විවිධ අවස්ථාවල මේ පිංකම් සඳහා දේශපාලන භේදයකින් තොරව සහභාගී වෙනවා. හිටපු ජනාධිපති මහින්ද රාජපක්ෂ මහතාද ඉතිහාසයේ සිතුල්පව්ව පිංකම් මාලාවට විටින් විට සහභාගී වන අවස්ථාවද අපට සිහියට නැගෙනවා. 2024 වසරේ පොසොන් පොහොය දිනයේදී තන්තිරිමලේ රජමහ විහාරයේ පැවැති අලෝක පූජාව සඳහා රනිල් වික්‍රමසිංහ ජනාධිපතිතුමාට ආරාධනය ලැබුණු වහාම එතුමා ඒ සඳහා සහභාගී වී සමස්ථ ශ්‍රී ලාංකික බෞද්ධයන් වෙනුවෙන් එම කටයුතු ආලෝකමත් කිරීම සඳහා ක්‍රියා කළ බව ශ්‍රී ලාංකික මහජනතාවට මතක් කරදීමට කැමතියි.
එම නිසා අනුරාධපුරයේ ප්‍රධාන පිංකම් ආගමික වැඩසටහන් සඳහා රනිල් වික්‍රමසිංහ මහතා සහභාගී නොවූ බවට කෙරෙන ප්‍රකාශ සියල්ලක්ම පදනම් විරහිත කරුණු බව ප්‍රකාශ කිරීමට කැමැත්තෙමි.
