මුල් ළමාවියට ‘ජාත්‍යන්තර සෙල්ලම් දිනය’ට සමගාමීව මුල් ළමාවිය සංවර්ධනය සඳහා සෙල්ලමේ වැදගත්කම පිළිබඳ කාන්තා හා ළමා කටයුතු අමාත්‍යාංශයේ අවධානය යොමු වේ.
“හැමදාම සෙල්ලම් කරන්න” තේමාව යටතේ ජූනි මස 11 දිනට යෙදී ඇති ජාතික සෙල්ලම් දිනය මූලික කරගනිමින් සෙල්ලම් භාවිතය මුල් ළමාවිය සංවර්ධනයට දායක කර ගන්නා ආකාරය පිළිබඳ කාන්තා හා ළමා කටයුතු අමාත්‍ය සරෝජා සාවිත්‍රී පෝල්රාජ් මහත්මිය, නියෝජ්‍ය අමාත්‍ය වෛද්‍ය නාමල් සුදර්ශන මහතා, කාන්තා හා ළමා කටයුතු අමාත්‍යංශ ලේකම්තුමියගේ ප්‍රධානත්වයෙන් විද්වතුන්ගේ අදහස් විමසීමට ලක් කෙරිණි.
මේ සඳහා, මුල් ළමාවිය සංවර්ධන ජාතික ලේකම් කාර්යාලය, unicef ආයතනය, බස්නාහිර පළාත් ආණ්ඩුකාර කාර්යාලය, බස්නාහිර පළාත් පෙර පාසල් උපදේශන කමිටුව නියෝජනය කරමින් විද්වතුන් ගණනාවක් සහභාගි වූහ. මුල් ළමාවිය සංවර්ධනයට සෙල්ලම් ඇසුරෙන් අධ්‍යාපන රටාව වෙනස් කිරීම තුළින් දරුවන්ගේ
මනෝ සාමාජයික කුසලතා සංවර්ධනය වීමත් චිත්තවේග පාලනය කිරීමටත් ලැබෙන පිටුබලය පිළිබඳවත් මෙහිදී විශේෂ අවධානයට ලක් විය.
දැනට පෙර පාසල් තුළ යොදාගන්නා අසුන්ගත අධ්‍යාපන රටාව වෙනුවට සෙල්ලම් ඇසුරෙන් අධ්‍යාපනය ලබාදීමටත් ඒ සඳහා භාවිත කළ හැකි සෙල්ලම් උපකරණ පිළිබඳවත් සාකච්ඡා විය.
ලබන වසර තුළදී මේ සඳහා ජාතික සැලැස්මක් සකස් කර ගුරුවරුන් දෙමාපියන් දරුවන් ඇතුළු ප්‍රජාව දැනුවත් කිරීමටත් එම ජාතික වැඩපිළිවෙළ පෙර පාසල් අධ්‍යාපන ක්‍රමවේදය තුළට අනුගත කිරීමේ හැකියාව පිළිබඳ අවධානය යොමු විය. පෙර පාසල සහ පළමු ශ්‍රේණිය අතර ඒකාබද්ධතාව ඇති කරලමින් මුල් ළමාවිය දරුවන් වෙහෙසකර අධ්‍යාපන රටාවෙන් මුදා ප්‍රීතිමත් අධ්‍යාපන රටාවකට අනුගත කරවීම මෙම වැඩපිළිවෙළෙහි මූලික අරමුණයි. මෙහිදී ඇවිදින පාසල නමින් පර්යේෂණාත්මක අධ්‍යාපන ක්‍රමවේදයක් ක්‍රියාවට නංවමින් සිටින මුල් ළමාවිය විශේෂඥ ඇවිදින පාසලේ අධ්‍යක්ෂ වසන්ත පෙරේරා මහතා සෙල්ලම් ඇසුරෙන් අධ්‍යාපනයේ ප්‍රායෝගික අවස්ථා සහ සෙල්ලම් උපකරණ පිළිබඳව අමාත්‍යවරියගේ අවධානය යොමු කරන ලදි.
