අනුරාධපුර නිවස පරීක්ෂාවට සෝදිසි වරෙන්තුවක්
කුඩාවියේ සිට ගිනිඅවි ඇසුරේ හැදී වැඩුණු ඔහුට ටී – 56 විශේෂත්වයක් නෑ – දුමින්දගේ නීතිඥ කියයි
හැව්ලොක් සිටි නිවාස සංකීර්ණයේ පිහිටි නිවසක පදිංචිකාරියක සන්තකයේ තිබී රන් ආලේපිත ටී – 56 වර්ගයේ ගිනිඅවියක් සොයාගැනීම සම්බන්ධයෙන් සිදුකරන විමර්ශන සඳහා අනුරාධපුරයේ පිහිටි හිටපු අමාත්‍ය දුමින්ද දිසානායක මහතාගේ නිවස පරීක්ෂා කිරීමට සෝදිසි වරෙන්තුවක් නිකුත් කළ ගල්කිස්ස මහෙස්ත්‍රාත් චතුරිකා ද සිල්වා මහත්මිය එම නඩුවේ 4 වන සැකකාර දුමින්ද දිසානායක මහතා ලබන 5 වැනිදා දක්වා තවදුරටත් රක්ෂිත බන්ධනාගාර ගත කිරීමට ඊයේ (29දා) නියෝග කළාය.
සැකකාර දුමින්ද දිසානායක මහතා ඕනෑම ඇප කොන්දේසියක් යටතේ මුදාහරින ලෙසට ඔහු වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් මහතා ඉල්ලීමක් කළ නමුත් විමර්ශන අවසන් නොමැති අවස්ථාවක සැකකරුට ඇප ලබාදීම නුසුදුසු බවට නිගමනය කොට එම ඉල්ලීම ප්‍රතික්ෂේප කළ මහෙස්ත්‍රාත්වරිය එම නියෝගය කළාය.
සිය සේවාදායකයාට එරෙහිව ගිනිඅවි ආඥා පනතේ 43 වගන්තිය යටතේ චෝදනා ගොනු කිරීම අතාත්තික බවත් එම පනත යටතේ චෝදනා ගොනු කළ හැක්කේ ගිනිඅවි සන්තකයේ තබාගැනීම, රැගෙන යෑම හෝ පාවිච්චි කිරීම යන වැරදිවලට බවත් පෙන්වාදුන් ජනාධිපති නීතිඥවරයා මෙම චෝදනා ඉදිරියට පවත්වාගෙන යෑමේ හැකියාවක් නොමැති බැවින් ඔහු ඇපමත මුදාහරින ලෙසට ඉල්ලා සිටියේය.
එම සැකකරුගේ පියා ද දේශපාලනඥයකු වන බැවින් 1985 වසරේදී අනුරාධපුර ශ්‍රී මහා බෝධියට ත්‍රස්ත ප්‍රහාර එල්ලවීමෙන් පසුව ඔහුගේ නිවසට පොලිස් විශේෂ කාර්ය බළකාය ඇතුළු ආරක්ෂක අංශවල ආරක්ෂාව සපයා තිබූ බවත්, කුඩා අවධියේ සිටම ගිනිඅවි ඇසුරේ හැදී වැඩුණු සිය සේවාදායකයා අවි ආයුධ නිතර දැක ඇති බවත් පැවසූ ජනාධිපති නීතිඥවරයා ඔහුට ටී – 56 ගිනිඅවියක විශේෂත්වයක් නොමැති බවද පැවැසීය.
එවැනි ගිනි අවියක් බැහැර කිරීමට අවශ්‍යතාව ඔහුට තිබුණේ නම් හැටඅට හැවිරිදි මිතුරිය හරහා එය බැහැර කිරීමේ අවශ්‍යතාවයක් නොමැති බවත් ඒ සඳහා අවශ්‍ය මිතුරන් ඔහුට සිටින බවත් ජනාධිපති නීතිඥවරයා වැඩිදුරටත් අධිකරණයට කියා සිටියේය.
රජයේ ජ්‍යෙෂ්ඨ අධිනීතිඥ දමිතිනි ද සිල්වා මහත්මිය නීතිපතිවරයා වෙනුවෙන් පෙනී සිට කරුණු දැක්වූවාය.
ඒ.ජේ.ඒ. අබේනායක
