දකුණු ඉන්දියාවෙන් සිංහලයන් සංක්‍රමණය වී ඇති බවත් සිංහලයන්ගේ ජාන වර්තමානයේ ඉන්දියාවේ ජීවත් වන ද්‍රවිඩ භාෂාව කතා කරන ජනගහනයට බොහෝදුරට සමාන බවත් පවසමින් ඉන්දියාවේ හින්දු පුවත්පතේ ආන්දෝලනයකට තුඩු දෙන ලිපියක් පළ කර තිබේ.
මෙයට පාදක වී ඇත්තේ Population histories of the Indigenous Adivasi and Sinhalese from Sri Lanka using whole genomes නම් පර්යේෂණ පත්‍රිකාවයි.
සිංහලයන් සහ මෙරට වැදි ජනයාගේ ජාන දකුණු ඉන්දියානුවන්ට සමීප වන බව මේ වාර්තාවේ කියයි.
වංශ දෙකකට අයත් ආදිවාසී (වැදි) පුද්ගලයින් 19 දෙනකුගෙන් සහ සිංහලයින් 35 දෙනකුගෙන් සම්පූර්ණ ජාන සාම්පල භාවිත කිරීමෙන් මෙම පර්යේෂණ සිදු කර තිබේ.
දකුණු ආසියාවේ ජනගහන වර්ධනය සඳහා ශ්‍රී ලංකාව ප්‍රධාන කාර්යභාරයක් ඉටු කර ඇති අතර, මීට වසර 40,000 කට පෙර සිට දිවයිනේ මානව පැවැත්ම පිළිබඳ පුරාවිද්‍යාත්මක සාක්ෂි ඇති බවත් මේ වාර්තාවේ කියයි.
සිංහල ජනතාව ක්‍රිස්තු පූර්ව 500 දී පමණ උතුරු ඉන්දියාවේ සිට ශ්‍රී ලංකාවට පැමිණි බවට ඇති කතාව හා මෙහි පරස්පරතා මතුව තිබේ. සිංහල භාෂාව ආර්ය බසකි.
චතුර පමුණුව
