දිවයිනේ පළාත් හතරක ඩෙංගු පැතිරයෑමේ වසංගත තත්ත්වයක් හට ගෙන තිබෙන බව සෞඛ්‍ය අමාත්‍යාංශය අනතුරු අඟවයි. බස්නාහිර, දකුණ, සබරගමුව සහ මධ්‍යම පළාත්වල රෝගීන් වාර්තාවීම් ඉහළ ගොස් ඇත.
වසරේ ජුනි මාසය දක්වා ඩෙංගු රෝගීන් 29412දෙනකු වාර්තා වී පුද්ගල මරණ 16ක් වාර්තා වූ බව ජාතික ඩෙංගු මර්දන ඒකකයේ ප්‍රජා සෞඛ්‍ය විශේෂඥ වෛද්‍ය ප්‍රශිලා සමරවීර මහත්මිය පැවැසුවාය.
කොළඹ, ගම්පහ, රත්නපුරය, මහනුවර, මඩකලපුව, ත්‍රිකුණාමලය දිස්ත්‍රික්කවල ඩෙංගු පැතිරයෑමේ ප්‍රවණතාවය ඉහළ ගොස් තිබෙන බව සිදුකළ පරීක්ෂණවලදී තහවුරු වී ඇත. සිදු කළ සමීක්ෂණවල දී වැඩ බිම්, රාජ්‍ය ආයතන, පාසල් ආශ්‍රිතව ඩෙංගු මදුරුවන්ගේ බෝවීම ඉහළ ගොස් තිබෙන බව තහවුරු වී ඇත.
මේ අතර ඩෙංගු මර්දන සතියේ මුල් දින තුනේ සිදු කළ සමීක්ෂණයේ දී මදුරුවන් බෝවන ලෙස පරිශ්‍ර පවත්වාගෙන ගිය පුද්ගලයින් 403 දෙනකුට විරුද්ධව නීතිමය පියවර ගෙන ඇති අතර පුද්ගලයින් 1977 දෙනකුට නිවේදන නිකුත් කර ඇත.
කඩින් කඩ ලැබෙන වැසි සමග ඩෙංගු මදුරුවන්ගේ බෝවීම ඉහළ ගොස් තිබෙන බවත් නිවාස, පරිශ්‍ර, වැඩ බිම්, පාසල්, සේවා ස්ථාන තුළ සහ අවට පවිත්‍ර කර මදුරුවන්ගෙන් තොර කලාප ලෙස පවත්වාගෙන යෑමට උනන්දු වන්නැයි ඉල්ලීමක් කරන බවත් සෞඛ්‍ය අංශ පවසයි.
නිමල් ගුණතිලක
