තවමත් ඇමරිකා එක්සත් ජනපදය සමග වෙළෙඳ ගිවිසුමකට එළඹීමට කටයුතු නොකළ රටවල් වෙත ද ඔවුන් ඉදිරියේදී ඇමරිකාවට අපනයනය කරන භාණ්ඩ සඳහා ගෙවිය යුතු අධික තීරුබදු අනුපාතයන් සඳහන් ලිපි කඩිනමින් යැවීමට පියවර ගන්නා බව ඇමරිකානු ජනාධිපති ඩොනල්ඩ් ට්‍රම්ප් පවසා තිබේ.
ලොව පුරා රටවල් සඳහා ඇමරිකාව සමග වෙළෙඳ ගිවිසුමකට එළඹීමට ලබා දී තිබූ කාලසීමාව මෙම මස 09 වැනිදායින් අවසන් වන බව සඳහන් කර ඇති ට්‍රම්ප් ජනාධිපතිවරයා මෙතෙක් ඇමරිකාව සමග ගිවිසුමකට නොඑළඹි රටවල් සඳහා බොහෝ දුරට ඊයේ (04) සිට එම ලිපි යැවෙනු ඇතැයි අවධාරණය කර තිබේ. ඊයේ දිනයේ අදාළ ලිපි යැවීම ආරම්භ කළහොත් දිනකට ලිපි 10ක් බැගින් විවිධ රටවල් වෙත යැවීමට කටයුතු කරන බව ද ට්‍රම්ප් ජනාධිපතිවරයා අනාවරණය කර තිබේ.
ඇමරිකානු ජනාධිපතිවරයාගේ දැනුම්දීමට අනුව ඊයේ වන විට ඇමරිකාව සමග තීරුබදු සම්බන්ධයෙන් ගිවිසුමකට එළඹීමට කැමැත්ත පළ කර තිබුණේ එංගලන්තය හා වියට්නාමය යන රටවල් දෙක පමණක් බව වාර්තා වේ. මෙසේ සාකච්ඡා හරහා ඇමරිකාව සමග වෙළෙඳ ගිවිසුමකට එළඹෙන රටවලට අධික තීරුබදු අනුපාතයන් ක්‍රියාත්මක නොවන බවත් එවැනි ගිවිසුමක් ඇතිකර නොගන්නා රටවලට සිය අපනයන භාණ්ඩ සඳහා අධික තීරුබදු ගෙවීමට සිදුවන බවත් ජනාධිපති ට්‍රම්ප් පවසයි. ඇමරිකානු ජනාධිපතිවරයා විසින් ඉකුත් අප්‍රේල් 02 වැනිදා ලොව පුරා සෑම රටකටම පාහේ ඇමරිකාවට අපනයනය කරන භාණ්ඩ වෙනුවෙන් අධික තීරුබදු අනුපාතයන් පනවනු ලැබීය.
ඒමන්ති මාරඹේ
