නිලධාරිනිය මහෙස්ත්‍රාත්ට පැමිණිලි කරයි
දූෂණ චෝදනා මත අල්ලස් හෝ දූෂණ විමර්ශන කොමිෂන් සභාව විසින් අත්අඩංගුවට ගෙන රක්ෂිත බන්ධනාගාර ගතකර සිටින ශ්‍රී ජයවර්ධනපුර මහ රෝහලේ විශේෂඥ වෛද්‍යවරියක වන මහේෂි විජේරත්නගේ දියණිය අධිකරණය භූමිය තුළදීම තමන්ට මරණීය තර්ජන එල්ල කළ බව අල්ලස් හෝ දූෂණ විමර්ශන කොමිෂන් සභාවේ සහකාර අධ්‍යක්ෂ ජනරාල් සුලෝචනා හෙට්ටිආරච්චි මහත්මිය ඊයේ (04දා) පස්වරුවේ කොළඹ ප්‍රධාන මහෙස්ත්‍රාත් තනුජා ලක්මාලි ජයතුංග මහත්මියට පැමිණිලි කළාය.
වහාම ඒ පිළිබඳව කෙසෙල්වත්ත පොලිසියට පැමිණිල්ලක් කරනා ලෙසට ප්‍රධාන මහෙස්ත්‍රාත්වරිය අල්ලස් කොමිෂන් සභාවේ සහකාර අධ්‍යක්ෂවරියට දැනුම් දුන්නාය.
මේ වනවිට අධිකරණයේ නියමයෙන් රක්ෂිත බන්ධනාගාර ගතකර සිටින ස්නායු රෝග පිළිබඳ විශේෂඥ වෛද්‍යවරියක වන මහේෂි විජේරත්න ඕනෑම ඇප කොන්දේසියක් යටතේ ඇපමත මුදාහරින්නැයි මෝසමක් මගින් නඩුව කැඳවමින් සැකකාරිය වෙනුවෙන් පෙනී සිටි ජනාධිපති නීතිඥ මෛත්‍රි ගුණරත්න මහතා ප්‍රධාන මහෙස්ත්‍රාත්වරියගෙන් ඉල්ලා සිටියේය. දීර්ඝ ලෙස කරුණු දක්වමින් ලේඛන රැසක් ඉදිරිපත් කරමින් ජනාධිපති නීතිඥවරයා එම ඉල්ලීම කළේය. එම ඉල්ලීමට විරුද්ධත්වය දක්වමින් අල්ලස් හෝ දූෂණ විමර්ශන කොමිෂන් සභාව වෙනුවෙන් පෙනී සිටි සහකාර අධ්‍යක්ෂ ජනරාල් සුලෝචනා හෙට්ටිආරච්චි මහත්මිය හා එකී විමර්ශන මෙහෙයවන පොලිස් පරීක්ෂක දිලුම් දුෂාන් මහතා කරුණු දැක්වූ අතර දෙපාර්ශ්වයේ කරුණු දැක්වීම්වලට සවන් දුන් ප්‍රධාන මහෙස්ත්‍රාත්වරිය එකී ඉල්ලීම සම්බන්ධයෙන් ලබන 08 වැනිදා එම සැකකාරිය ඇතුළු සෙසු සැකකරුවන් දෙදෙනා අධිකරණයට ඉදිරිපත් කළ පසු සුදුසු නියෝගයක් නිකුත් කරන බව දැනුම් දුන්නාය.
එම නඩු කටයුත්ත අවසන් වී පෙරවරු 3.30ට පමණ තමන් හා ප්‍රධාන විමර්ශන නිලධාරියා අධිකරණ භූමියෙන් නික්ම යමින් සිටියදී පළමුවන සැකකාරිය වන මහේෂි විජේරත්නගේ දියණිය තමුන් ඉදිරියට පැමිණ එකී මරණීය තර්ජනය එල්ල කර කඩිනමින් අධිකරණ භූමියෙන් නික්ම ගිය බව සුලෝචනා හෙට්ටිආරච්චි මහත්මිය විවෘත අධිකරණය හමුවේදී ප්‍රධාන මහෙස්ත්‍රාත්වරිය පැමිණිලි කළාය.
ඒ.ජේ.ඒ. අබේනායක
