වරායෙන් බහාලුම් 323ක් පරීක්‍ෂණයකින් තොරව නිදහස් කිරීම සම්බන්ධයෙන් පත්කළ කමිටුව වාර්තාව එළිදක්වන්නේ නැතිව සඟවාගෙන සිටියේ ඉන් ආණ්ඩුවට වාසියක් අත්නොවන බැවින් බවත්, යම් වාසියක් වන්නේ නම් ආණ්ඩුව මෙම වාර්තාව පාර්ලිමේන්තුවටත් ඉදිරිපත් කරන බව සමගි ජන බලවේගය පාර්ලිමේන්තු මන්ත්‍රී මුජිබර් රහුමාන් මහතා පැවසීය. එම පක්ෂයේ ප්‍රධාන කාර්යාලයේ ඊයේ (04 දා) පැවැති මාධ්‍ය හමුවට සහභාගි වෙමින් වැඩිදුරටත් මෙසේද කීය.
බහාලුම් 309 පිටකිරීම සම්බන්ධයෙන් කරුණු රැසක් හෙළිවෙලා තිබෙනවා. එම කමිටුව නිර්දේශ රැසක් ඉදිරිපත් කර තිබෙනවා. කෙසේ නමුත් එම නිර්දේශ ක්‍රියාත්මක කිරීම සම්බන්ධයෙන්ද ආණ්ඩුව නිහඬ පිළිවෙතක් අනුගමනය කරන බව පෙනෙන්න තිබෙනවා. ඒ වගේම මේ සිද්ධිය සම්බන්ධයෙන් ආණ්ඩුවේ මැති ඇමැතිවරු විවිධ පිළිතුරු ලබාදෙන්න කටයුතු කරනවා.
2025 ජනවාරි මාසයේ 18 වැනිදා සිදුවුණ මෙම බහාලුම් සිද්ධිය පිළිබඳව ජනාධිපතිවරයාව මුලින්ම දැනුම්වත් කරන්නේ රේගු නිලධාරීන්ගේ සංගමය. ඔවුන් ජනවාරි මාසයේ 20 වැනිදා තමයි මෙම හෙළිදරව්ව සිදු කරන්නේ. රතු නිවේදන නිකුත් කළ බහාලුම් 323ක් කිසිදු පරීක්ෂාවකින් තොරව පිටකළ බව ඔවුන් සඳහන් කරනවා. ඒ වගේම ජනාධිපතිවරයා මේ සම්බන්ධයෙන් සොයා බලන්න කමිටුවක් පත් කරන්නේ රේගු නිලධාරින්ගේ අනාවරණයෙන් පසුවයි. ඒ වගේම රටේ මෙම සිද්ධිය සම්බන්ධයෙන් විශාල කතාබහක් ඇතිවුණාට පසුව ජනාධිපතිවරයා මෙම කමිටුව පත් කරන්න තිරණය කරනවා. මෙම බහාලුම් 323ක් තුළ කිසිදු නීති විරෝධී දෙයක් නොතිබුණ බව ආණ්ඩු පාර්ශ්වය මාධ්‍යවලට ප්‍රකාශ කළා. ඒ වගේම මෙම බහාලුම් තොගය නිදහස් කිරීමට අවසර දුන් බව වරාය නියෝජ්‍ය ඇමැතිවරයා ප්‍රකාශ කර තිබුණා. කෙසේ නමුත් මේ සිද්ධියට රේගු නිලධාරීන් සම්බන්ධ නම් ඔවුන්ට දඬුවම් දෙන බව ආණ්ඩුව දැන් ප්‍රකාශ කරනවා. ඒ වගේම මෙම සිද්ධියට දේශපාලනඥයන්ගේ නම් සඳහන් වෙන්නේ නැති බවත් ආණ්ඩු පාර්ශ්වය ප්‍රකාශ කරනවා.
සිද්ධිය පිළිබඳව වාර්තාව එළියට පැමිණි පසු ආණ්ඩුව කලබල වෙලා තිබෙනවා. කෙසේ නමුත් එම කමිටු වාර්තාවේ තිබෙන නිර්දේශ ක්‍රියාත්මක කරන්න ආණ්ඩුව වහාම කටයුතු කළ යුතුයි. ඒ වගේම මෙම සිද්ධිය සම්බන්ධයෙන් අධිකරණ ක්‍රියාමාර්ගවලට යන්න හැකියාවක් තිබෙනවාද කියා අපි සොයා බලමින් සිටිනවා.
ඇමරිකාවෙන් පනවා තිබෙන තීරු බද්ද සම්බන්ධයෙන් ආණ්ඩුව කිසිදු පියවරක් ගන්නා බවක් පෙනෙන්න නෑ. කෙසේ නමුත් වියට්නාමය, ඇමරිකාව සමඟ යම් එකඟතාවකට පැමිණ තිබෙනවා. ඒ වගේම අනෙකුත් රටවල් සියල්ල ඇමරිකාව සමඟ සාකච්ඡා කර ඔවුන්ගේ රටවල්වලට වාසිවන ආකාරයේ එකඟතාවලට එළැඹිලා තිබෙනවා. නමුත් මේ පිළිබඳව කමිටුවක් පත්කර ඇමරිකානු රජය සමඟ සාකච්ඡා ආරම්භ කර තිබෙන බව ජාතික ජනබලවේග ආණ්ඩුව ප්‍රකාශ කළා. ඒ වගේම මෙම සාකච්ඡාවල ප්‍රගතිය පිළිබඳව රටට දැනුම් දෙන බවත් ඔවුන් ප්‍රකාශ කළා. කෙසේ නමුත් ලංකා රජය ඇමරිකාව සමඟ සිදුකළ සාකච්ඡාවල ප්‍රගතිය හෙළිවෙලා නෑ. මේ පිළිබඳව ආණ්ඩුව රටට හෙළි කරයි කියලා අපි බලාපොරොත්තු වෙනවා.
