ලොව සිටින ධනවත්ම පුද්ගලයා වන එලෝන් මස්ක්ට අයත් ‘ස්පේස් එක්ස්’ සමාගම විසින් අත්හදා බැලීම සඳහා අභ්‍යවකාශයට යැවූ ‘ස්ටාර් ෂිප්’ අභ්‍යවකාශ යානය පෙරේදා (27) ඉන්දීය සාගරයට ඉහළින් පුපුරා ගොස් විනාශ වී තිබේ. මෙම ස්ටාර් ෂිප් යානය පුපුරා යෑම අඟහරු ග්‍රහයා යටත් විජිතයක් කරගැනීමේ මස්ක්ගේ සිහිනයට බාධා වීමක් බව විදෙස් මාධ්‍ය පවසයි. මෙසේ ස්ටාර් ෂිප් යානය පුපුරා ගොස් ඇත්තේ තුන්වැනි වරට වන අතර මෙය එම යානයේ නව වැනි අත්හදාබැලීම බව වාර්තා වේ.
මෙසේ පුපුරා ගොස් ඇති ස්ටාර් ෂිප් යානය අභ්‍යවකාශගත කිරීම සඳහා යොදාගෙන ඇත්තේ අභ්‍යවකාශ යානා මුදාහැරීම සඳහා භාවිත කළ දැවැන්තම හා බලවත්ම යානා දියත් කිරීමේ වාහනය බව වාර්තා වේ. ස්ටාර් ෂිප් යානය පෙරේදා (27) ඇමරිකානු වේලාවෙන් සවස් කාලයේ දකුණුදිග ටෙක්සාස් ප්‍රාන්තයේ පිහිටි අභ්‍යවකාශ මධ්‍යස්ථානයෙන් දියත් කර තිබිණි.
