සමාගම් ද්විත්වයෙහි නියෝජිතයන් ඉදිරියේ දී කොමර්ෂල් බැංකුවේ සහකාර සාමාන්‍යාධිකාරී – පුද්ගලික බැංකුකරණය සහ පාරිභෝගික නිෂ්පාදන සංවර්ධනය කපිල ලියනගේ මහතා සහ එවලුෂන් ඔටෝ සමූහයේ ප්‍රධාන විධායක නිලධාරී විරාන් ද සොයිසා මහතා අවබෝධතා ගිවිසුම හුවමාරු කර ගැනීම.
කොමර්ෂල් බැංකුව විසින් එවලුෂන් ඔටෝ සමාගම සමඟ සහයෝගීතාවක් තුළින් ශ්‍රී ලංකාව තුළ නව බලශක්ති වාහන වෙත සංක්‍රමණය වේගවත් කිරීමට ප්‍රවර්ධන වැඩසටහනක් නිවේදනය කර ඇත.
බැංකුව විසින් 2025 වර්ෂයේ අවසන් වන තෙක් එවලුෂන් ඔටෝ ගැනුම්කරුවන්ට සමාගම විසින් අලෙවි කරන සියලුම විදුලි වාහන පරාසය ආවරණය වන ලෙස ආකර්ෂණීය විශේෂ ලීසිං විකල්ප සහ ප්‍රතිලාභ ලබා දීමට කටයුතු කර ඇති අතර, එම සමාගම මෙම උපායමාර්ගික හවුල්කාරිත්වය යටතේ කොමර්ෂල් බැංකුව මඟින් ලීසිං කරන ලද වාහනවලට රුපියල් මිලියන 1.5 ක් දක්වා වට්ටම් ලබා දෙන බව තහවුරු කර ඇත.
එවලුෂන් ඔටෝ පුද්ගලික සමාගම විසින් අලෙවිකරණ KYC V7, KYC V5, Riddara AIR, Riddara Pro, Radar Horizon Pro, සන්රූෆ් සහිත Riddara Horizon Pro සහ AVATR 11 ඇතුළු සම්පූර්ණ විද්‍යුත් මගී සහ වාණිජ වාහන පරාසය ආවරණය කරමින් මෙම ප්‍රවර්ධන වැඩසටහන මඟින් විශේෂ දීමනා හිමි වෙයි.
අඩු පොලී අනුපාත ඇසුරෙන් ආකර්ෂණීය වාරික, පාරිභෝගික ඉල්ලීම්වලට අනුකූලව සකස් කළ ගෙවීම් සැලසුම් සහ ඉතා ඉක්මනින් අයදුම්පත්වලට අනුමැතිය ලබාදීමට අමතරව, මෙම ප්‍රවර්ධනය යටතේ ලබා දෙන සියලුම ලීසිං සැලසුම් හරිත ලීසිං ලෙස සැලකීමට කොමර්ෂල් බැංකුව එකඟ වී ඇති අතර ඒ තුළින් එම කාණ්ඩයේ ප්‍රතිලාභ ලැබීමට සුදුසුකම් ලැබෙයි.
කොමර්ෂල් බැංකුව සුපර් ලීසිං පහසුකම යටතේ වසර හතක ලීසිං සඳහා සෑම රුපියල් 100,000 කටම වාහන ලීසිං සඳහා රුපියල් 1,598.00 ක අඩුම වාරිකයක් ලබා දෙයි.
කොමර්ෂල් බැංකුවේ ලීසිං ගනුදෙනුකරුවන් හට බැංකුවේ සුපර් ලීසිං සහ හයිබ්‍රිඩ් ලීසිං පහසුකම් හරහා ඒක පුද්ගල ආදායමට ගැලපෙන ලෙස සකස් කළ ලීසිං පහසුකම් ලබා ගැනීමේ අවස්ථාව හිමිව ඇත.
කොමර්ෂල් බැංකුව ලෝකයේ හොඳම බැංකු 1000 අතරට පත්වු පළමු දේශීය බැංකුව වන අතර කොළඹ කොටස් වෙළඳපොළ බැංකු අංශයේ ඉහළම වෙළඳපොළ ප්‍රාග්ධනකරණයක් ඇති බැංකුව වේ. ශ්‍රී ලංකාවේ සුළු සහ මධ්‍යම පරිමාණයේ ව්‍යාපාරවලට විශාලතම ණය සම්පාදනය කරන්නා මෙන්ම දේශීය බැංකු ක්‍ෂේත්‍රයේ ඩිජිටල් නව්‍යකරණය සඳහා ප්‍රමුඛයෙකු වන කොමර්ෂල් බැංකුව ශ්‍රී ලංකාවේ පරිසරයට කාබන් මුදාහැරීම 100% තුලනය කළ ප්‍රථම බැංකුව ද වේ.
