ජාතික තොරතුරු හා සන්නිවේදන තාක්ෂණ විසඳුම් සම්පාදක වන SLT-MOBITEL සහ විශ්‍රාම වැටුප් දෙපාර්තමේන්තුව අතර දිගු කලක පටන් පවතින හවුල්කාරීත්වය තවදුරටත් දීර්ඝ කිරීමට දෙපාර්ශ්වය විසින් පසුගියදා පියවර ගන්නා ලදී. මෙය රාජ්‍ය අංශය තුළ සේවය කර විශ්‍රාම ගිය පුද්ගලයන්ට ඩිජිටල් තාක්ෂණික පහසුකම් සමීප කරවීම සඳහා ගනු ලබන සාමූහික ප්‍රයත්නයක ප්‍රතිඵලයකි. දෙපාර්ශ්වය අතර පවතින මෙම අතිසාර්ථක හවුල්කාරීත්වයකට දශකයකට අධික ඉතිහාසයක් ඇත.
අලුත් කරන ලද හවුල්කාරීත්වය යටතේ රාජ්‍ය අංශයේ විශ්‍රාමිකයන්ට ඩිජිටල් උපාංග පහසු ගෙවීමේ ක්‍රමයට මිලදී ගැනීම සඳහා හඳුන්වා දී තිබූ ක්‍රමවේදය තවදුරටත් දීර්ඝ කර තිබේ. මෙම ක්‍රමවේදය හේතුවෙන් විශ්‍රාමිකයන්ට විශාල මුදලක් එකවර ගෙවීමෙන් තොරව, තරගකාරී වෙළෙඳපොළ මිලගණන් යටතේ ස්මාර්ට් දුරකථන සහ වෙනත් ඩිජිටල් උපාංග මිලදී ගැනීමට අවස්ථාව හිමි වී ඇත. මෙම ක්‍රමයේ විශේෂත්වය වන්නේ එහි පහසු ගෙවීමේ ක්‍රමය සකස් කර ඇති ආකාරයයි. ඒ යටතේ මාසික වාරිකය විශ්‍රාමිකයන්ගේ මාසික විශ්‍රාම වැටුපෙන් අඩුකර ගැනෙන බැවින් ඔවුන්ට ගෙවීම් සම්බන්ධයෙන් දුෂ්කරතා ඇති නොවේ.
මෙම ක්‍රමය යටතේ විශ්‍රාමිකයන්ට නවතම ස්මාර්ට් දුරකථන සහ බ්‍රෝඩ්බෑන්ඩ් පහසුකම් ලබාගැනීමට අවස්ථාව උදාකර දීමට SLT-MOBITEL පියවර ගෙන තිබේ. එලෙස ස්මාර්ට් දුරකථන මිලදී ගන්නා විශ්‍රාමිකයන්ට, ඔවුන් වෙනුවෙන්ම හඳුන්වා දී ඇති සුප්‍රකට SLT-MOBITEL උපහාර’ පැකේජයද ලබාගත හැක.
Mobitel (පුද්.) සමාගමේ ප්‍රධාන මෙහෙයුම් නිලධාරී සුදර්ශන ගීගනගේ මහතා, විශ්‍රාම වැටුප් දෙපාර්තමේන්තුවේ අධ්‍යක්ෂ ජනරාල් චමින්ද හෙට්ටිආරච්චි මහතා සමග අවබෝධතා ගිවිසුම හුවමාරු කරගත් අයුරු ඡායාරූපයෙන් දැක්වේ.
