ශ්‍රී ලාංකික සංචාරකයන් මැලේසියාවට පැමිණීම ප්‍රවර්ධනය කිරීම සඳහා මැලේසියානු සංචාරක මණ්ඩලය, ශ්‍රී ලංකන් ගුවන් සේවය සමග හවුල්කාරීතවයකට එළැඹී ඇත.
නව හවුල්කාරීත්වයත් සමග මැලේසියාවේ පුත්‍රජයා, මලාකා, ජෙන්ටින් අයිලන්ඩ් සහ ක්වාලාලම්පූර් යන නගර ශ්‍රී ලාංකික සංචාරකයන් සඳහා ප්‍රවර්ධනය කිරීමට කටයුතු කරනු ලැබේ.
ශ්‍රී ලංකාවේ ආර්ථිකය සියයට 5ක පමණ වේගයකින් වර්ධන වෙමින් පවතින අතර ශ්‍රී ලාංකික සංචාරකයන් අතර විදේශ සංචාරක රුචිය ඉහළ යමින් පවතින බැවින්, වසර පුරා මැලේසියාවේ ක්වාලාලම්පූර් වෙත ගුවන් ගමන් ප්‍රමාණය වැඩි කිරීම සඳහා ශ්‍රී ලංකන් ගුවන් සේවය කටයුතු කර තිබේ.
මේ පිළිබඳව ‘දිවයින’ට අදහස් දක්වමින් ශ්‍රී ලංකන් ගුවන් සේවයේ ආයතනික සන්නිවේදන කළමනාකරු දීපාල් පෙරේරා මහතා පැවසුවේ, ශ්‍රී ලාංකිකයන්ට මැලේසියාවට පැමිණීම ප්‍රවර්ධනය කිරීමට පමණක් නොව, ශ්‍රී ලාංකිකයන්ට මැලේසියාවට පැමිණීම ප්‍රවර්ධනය කිරීමට ද උනන්දු වන බැවින්, මෙම හවුල්කාරිත්වය සමග සංචාරක ව්‍යාපාරයේ ද්විපාර්ශ්වික වර්ධනය සඳහා ඉහළ විභවයක් ශ්‍රී ලංකන් ගුවන් සේවය දකින බවයි. ගමනාන්ත දෙකම ඔවුන්ගේ සංචාරක යටිතල පහසුකම් වැඩි කරමින් සිටින බැවින්, මැලේසියානුවන්ට සහ ශ්‍රී ලාංකිකයන්ට එකිනෙකාගේ රටවලට ගොස් නිවාඩුවක් භුක්ති විඳිමින් දෙරටේ අතීත උරුමය, සංස්කෘතිය සහ ආහාර පිළිබඳව අත්විඳීමට අවස්ථා වැඩි වෙමින් පවතින බවත් දීපාල් පෙරේරා මහතා වැඩිදුරටත් සඳහන් කළේය.
මැලේසියානු සංචාරක ව්‍යාපාරයේ ජ්‍යෙෂ්ඨ අධ්‍යක්ෂකවරියක් මෙසේ පැවසුවාය. “ශ්‍රී ලංකාවෙන් මැලේසියාවට පැමිණෙන ශ්‍රී ලාංකික සංචාරකයන්ගේ සැලකිය යුතු වර්ධනයක් අපට දැකගත හැකිය. විශේෂයෙන් අපි 2025 පෙබරවාරි මාසයේදී ‘මැලේසියාවට පිවිසෙන්න’ ප්‍රවර්ධන වැඩසටහන ක්‍රියාත්මක කිරීම සඳහා ශ්‍රී ලංකාවට පැමිණිදා සිට. අපට චීනය, තායිලන්තය, සිංගප්පූරුව සහ ඉන්දියාවෙන් අපගේ ඉහළම පැමිණීම් ලැබෙනවා. දැන් අපට වැඩි වැඩියෙන් ශ්‍රී ලාංකිකයන් පවුලේ නිවාඩු සහ ආයතනික සංචාර සඳහා මැලේසියාවට පැමිණෙන බව අපට දක්නට ලැබෙනවා. ඊට අමතරව ඔවුන්ගෙන් බොහෝ දෙනෙක් ක්වාලාලම්පූර්හි සාප්පු සවාරි යෑමට කැමැත්තක් දක්වනවා, මන්ද මෙහි ඇති භාණ්ඩ අසල්වැසි අනෙකුත් රටවලට වඩා උසස් තත්ත්වයේ සහ දැරිය හැකි මිලකට ලබා ගත හැකි බව ඔවුන් දන්නවා. අපගේ සංඛ්‍යාලේඛනවලට අනුව, එක් ශ්‍රී ලාංකික සංචාරකයකු සාමාන්‍ය වියදම් සඳහා මැලේසියානු රිංගිට් 7,000 ක් පමණ වැය කරන අතර එය අනෙකුත් රටවල්වලින් පැමිණෙන සංචාරකයන් හා සැසඳීමේදී ඉහළ අගයක්. එයට හේතුව ශ්‍රී ලාංකික සංචාරකයන් නිවාඩු ගත කරන අතරතුර මෙහි සාප්පු සවාරි සඳහා වැඩියෙන් යොමු වීමයි.”
2025 සැප්තැම්බර් 27 වැනිදා ලෝක සංචාරක දිනය පැවැත්වීමට නියමිත බැවින්, ශ්‍රී ලංකන් ගුවන් සේවය සහ මැලේසියාවේ සංචාරක මණ්යඩලය යන ආයතන දෙකම, ශ්‍රී ලන්කන් ගුවන් සේවයෙන් මැලේසියාවට පියාසර කරන ගුවන් මගීන්ට ප්‍රතිලාභ ලබා දීමේ අරමුණින් මේ සම්බන්ධයෙන් දැනුවත් කිරීමේ වැඩසටහන් වැඩි කිරීමට සැලසුම් කර ඇත. මෙම කරුණු අනාවරණය වූයේ මැලේසියානු සංචාරක මණ්ඩලය සහ ශ්‍රී ලංකන් ගුවන් සේවය එක්ව මැලේසියාවේදී පැවත්වූ මාධ්‍ය හමුවකදීය.
ප්‍රභාත් විතාන මැලේසියාවේ පුත්‍රජයා සිට…
