උත්තර දෙන්න ආණ්ඩුව කල් ගනී
ඉන්දීය අගමැති නරේන්ද්‍ර මෝදි මහතා සමග වත්මන් ආණ්ඩුව අත්සන් කළ ගිවිසුම් සහ ඒවායේ තොරතුරු පිළිබඳව විපක්ෂයේ මන්ත්‍රී අජිත් පී. පෙරේරා (සජබ) මහතා ඊයේ (04දා) පාර්ලිමේන්තුවේදී ප්‍රශ්න ගණනාවක් ඉදිරිපත් කළ අතර ඊට පිළිතුරු දීමට ආණ්ඩුව කල් ගත්තේය.
අගමැතිනියගෙන් ප්‍රශ්න ඇසීම සඳහා ඇති වටයේදී අජිත් පී. පෙරේරා මන්ත්‍රීවරයා ඒ සම්බන්ධයෙන් ප්‍රශ්න 05 ක් යටතේ ප්‍රශ්න 10ක් විමසීය. ඒ මහතා විසින් අසන ලද ප්‍රශ්න මේවාය.
ඉන්දීය අගමැති නරේන්ද්‍ර මෝදි මහතා 2025-04-4 සහ 04-5 වැනි දින මෙරට නිල සංචාරයකට පැමිණි අවස්ථාවේ ශ්‍රී ලංකාව සහ ඉන්දියාව අතර අත්සන් කරන ලද ගිවිසුම් ගණන කොපමණද? එම ගිවිසුම්වලට අදාළ විෂය පථයන් මොනවාද? එම ගිවිසුම්වලට ශ්‍රී ලංකාව වෙනුවෙන් අත්සන් කරන ලද තැනැත්තන් කවුද? එම ගිවිසුම්වලට අදාළ විෂය භාර අමාත්‍යාංශ මොනවාද? ඒ ගිවිසුම් සඳහා ශ්‍රී ලංකා රජයේ නීතිපතිවරයාගේ අවසරය හිමිවූ දිනයක් කවරේද? එම ගිවිසුම් අත්සන් කිරීමට පෙර ඒවාට කැබිනට් අනුමැතිය ලැබුණාද? එම ගිවිසුම් සඳහා කැබිනට් අනුමැතිය ලබා ගැනීමට ඉදිරිපත් කළ කැබිනට් පත්‍රිකාවල අංක මොනවාද? එම ගිවිසුම් සියල්ලේම පිටපත් අද සභා ගත කරන්නේද? රාජ්‍ය පාලනයේ පාරදෘෂ්‍යභාවය ආරක්ෂා කිරීමට ඉහත ගිවිසුම් සභාගත කිරීම අත්‍යවශ්‍ය බව පිළිගන්නේද? එසේ නොමැති නම් ඒ ඇයි?
එම අවස්ථාවේ අගමැතිනි හරිනි අමරසූරිය මෙනවිය අසුන්ගෙන සිටි අතර නැගී සිටි සභානායක, අමාත්‍ය බිමල් රත්නායක මහතා කියා සිටියේ එම ප්‍රශ්න සඳහා පිළිතුරු දීමට කල් ගන්නා බවත් පිළිතුරු දීමට හැකි විගස ඊට පිළිතුරු ලබා දෙන බවත්ය.
අජිත් පී. පෙරේරා මහතා – 2025-04-04 සහ 2025-04-05 වැනි දින තමයි මේ ගිවිසුම් අත්සන් කළේ. මේ ගිවිසුම් සම්බන්ධයෙන් මේ සභාවේ දිගින් දිගටම ප්‍රශ්න කළා. මේ ගිවිසුම් විධිමත්ව සභාගත කරන ලෙස ඉල්ලීම් කළා. මේ ප්‍රශ්නය යොමු කළේ පිළිතුරු සපයන්න ප්‍රමාණවත් කාලයක් දීලායි. එසේ තිබියදී මෙම වැදගත් ප්‍රශ්නයට පිළිතුරු දීමට කල් ගැනීම ප්‍රශ්නයට පිළිතුරු දීම මගහැරීමක් ලෙසයි අප සලකන්නේ. සභානායකතුමා යම් නිශ්චිත දිනයක් කියන්න පුළුවන්ද පිළිතුරු දෙන්නේ කවදාදා කියලා.
සභානයක, අමාත්‍ය බිමල් රත්නායක මහතා – මේ සඳහා පිළිතුරු දීමට අමාත්‍යාංශ කිහිපයකින් තොරතුරු ගැනීමට තිබෙනවා. අපි ඒ තොරතුරු ලබා ගෙන ඉදිරි පාර්ලිමේන්තු දිනයකදී මේ සඳහා හරි පිළිතුරු ලබා දෙන්නම්.
