ජාතික ඉදිකිරීම් සංගමයේ සභාපති
රටේ ඉදිකිරීම් සංවර්ධන ව්‍යාපෘති වෙනුවෙන් රුපියල් බිලියන 500ක් වෙන් කර තිබියදීත් ඇතැම් ඇමැතිවරුන්ගේ හා රාජ්‍ය නිලධාරීන්ගේ අකාර්යක්‍ෂමතාව නිසා ව්‍යාපෘති විශාල ප්‍රමාණයක් නතරවී තිබෙන බව ශ්‍රී ලංකා ජාතික ඉදිකිරීම් සංගමයේ සභාපති එම්. ඩී. පෝල් මහතා සඳහන් කළේය.
ජනාධිපතිවරයාට රටේ සංවර්ධන ව්‍යාපෘති ආරම්භ කිරීමට වුවමනාවක් තිබුණද එම ඉදිකිරීම් භාරව සිටින වගකිවයුත්තන්ට ඒ සඳහා නිසි වුවමනාවක් නොමැති බව පසුගියදා එම සංගම් මූලස්ථානයේ පැවැති මාධ්‍ය හමුවකට සහභාගි වෙමින් සභාපතිවරයා සඳහන් කළේය. එහිදී වැඩිදුරටත් කතා කළ සභාපති නෙවිල් මහතා මෙසේද කීය.
මේ රජය භාරගෙන මාස හතකටත් ආසන්නයි. ඒත් තවම බිලියන පහකවත් ව්‍යාපෘති ආරම්භ කරලා නැහැ. ඒ නිසා ඉදිකිරීම් ව්‍යාපෘති සඳහා ඇතැම් ඇමැතිවරුන් මෙන්ම අමාත්‍යාංශ ලේකම්වරුන් හා රාජ්‍ය නිලධාරීන් නිසි අවධානයක් යොමුකර නැහැ. කඩාවැටුණු ඉදිකිරීම් කර්මාන්තය නව රජය යටතේ නඟාසිටුවීමට හැකිවනු ඇතැයි අපි බලාපොරොත්තුවෙන් හිටියා.
2024 අය වැය ලේඛනයෙන් රටේ යටිතල පහසුකම් සඳහා බිලියන 500ක් වෙන්කර තිබුණා. ඒ නිසා කොටසක් හෝ කරයි කියා බලාපොරොත්තු වුණා. නමුත් ඒ බලාපොරොත්තු බිඳවැටිලා තියෙන්නේ. ඒ වගේම විදේශ ණය ආධාර යටතේ ආරම්භ කළ යුතු ව්‍යාපෘතියක් ආරම්භ කර නැහැ. ඒ සඳහා වගකිව යුතු ඇමැතිවරුන් ලේකම්වරුන් හා රාජ්‍ය නිලධාරීන් ගැන සොයාබලා පියවරක් ගන්නා ලෙස ජනාධිපතිවරයාගෙන් ඉල්ලා සිටිනවා.
අරුණ බෝගහවත්ත
