ජයග්‍රහණයේ අරමුණ ඇතිව ශ්‍රී ලංකාව අද තරග බිමට

ආසියානු ශූරතා පිරිමි රග්බි පාපන්දු තරගාවලිය

ආසියානු රග්බි පාපන්දු සම්මේලනයේ මෙහෙයවීමෙන් දැන් ක්‍රියාත්මක ආසියානු ශූරතා පිරිමි රග්බි පාපන්දු තරගාවලියේ 05 වැනි තරගය අද (05දා) ප.ව. 04.00 ට කොළඹ රීඩ් මාවතේ පිහිටි පැරණි තුරඟ තරග පිටියේ දී ක්‍රියාත්මක කෙරේ. ඒ, ප්‍රතිවාදී එක්සත් අරාබී එමීර් රාජ්‍යයට එරෙහිවයි.

පළමු තරගයේ දී දකුණු කොරියාව හමුවේ ද දෙවන තරගයේ දී හොංකොං දේශය හමුවේ ද පරාජය ලැබූ ශ්‍රී ලංකා කණ්ඩායම තම තෙවන තරගය ජයග්‍රහණයකින් නිමා කිරීමේ අරමුණ ඇතිව අද තරග බිමට පිවිසෙති.

මෙතෙක් ක්‍රියාත්මක කෙරුණු තරග ආශ්‍රිතව වැඩි ගෞරව අත්කර ගැනීමට හොංකොං දේශය සමත් වී ඇත්තේ ප්‍රසාද ලකුණු 10 ක් සමගිනි. එකී දෙවන ස්ථානය ලකුණු 07 කට හිමිකම් කියන දකුණු කොරියාව හිමිකර ගෙන ඇති අතර වාරයේ දී ලකුණු 05 ක් සමගින් තෙවන ස්ථානය තහවුරු කර ගැනීමට එක්සත් අරාබී එමීර් රාජ්‍යය සමත්ව සිටිති. ශ්‍රී ලංකාව සතු ලකුණු සංඛ්‍යාව 02 කි.

මෙම තරගාවලියේ 06 වැනි තරගය හෙට (05දා) දකුණු කොරියාව සහ හොංකොං දේශය අතර පැවැත්වේ.

2027 වසරේ ඔස්ටේ්‍රලියාවේ දී ක්‍රියාත්මක කෙරෙන ලෝක කුසලාන තරගාවලියට සුදුස්සන් තෝරා ගැනීම උදෙසා මෙම තරගාවලිය පැවැත්වේ.

අද තරගයට මුහුණ දෙන ශ්‍රී ලංකා කණ්ඩායම පහත දැක්වේ.

තරින්ද රත්වත්තේ – (නායක), ලසිඳු කරුණාතිලක – (උප නායක), මලිත විජේසුන්දර, ශාමික කෞෂාන්, විමුක්ති ගමගේ, නවීන් මාරසිංහ, තිළිණ බණ්ඩාර, නිස්රාන් නිලාර්, තරිඳු චතුරංග, මොහොමඩ් රිෆාන්, තෙනුක නානායක්කාර, ඩිනාල් ඒකනායක, ආකාෂ් මධුසංක, පසිඳු බණ්ඩාර, ඇඩම් ගවුඩර්, අම්ජාඩ් ෆවුමි, දුෂ්මන්ත ප්‍රියදර්ශන, පුලස්ති දසනායක, චතුර සොයිසා, නිරෝෂ් පෙරේරා, මුෂීඩ් දොරේ, ෂාහිඩ් සුම්රි, ප්‍රිමේෂ් ධනුෂ්ක, නවීන් කනිෂ්ක.

රොහාන් චින්තක මහතා (කළමනාකරු), රොඩ්නි ගිබ්ස් මහතා (ප්‍රධාන පුහුණුකරු), දුෂාන්ත ලෙව්කේ මහතා (ඉදිරි පෙළ පුහුණුකරු),

ලසින්ත ද කොස්තා මහතා (පසු පෙළ පුහුණුකරු)

අනුරුද්ධ හේරත් බණ්ඩාර