මොළය මියගොස් දින කිහිපයක් ගතවූ පුද්ගලයකුට ස්නායු සැත්කමක් කළ වෛද්‍යවරියක පිළිබඳ ඊයේ දිවයිනේ ප්‍රධාන පුවතේ පළ විය. මොළය මියගිය කෙනකුට සැත්කමක් කිරීම සමාන වන්නේ ඊජිප්තුවේ පිරමීඩයකින් ගොඩගත් මමියකට කරන සැත්කමකට ය. මේ සැත්කම් දෙකේදීම රෝගියා නැගිටින්නේ නැත. මමියකට කොහොමටත් මොළයක් නැත. මමියක් සකස් කිරීමේ දී මොළය ඇතුළු සියලු අභ්‍යන්තර අවයව ඉවත් කරනු ලැබේ. මෙහිදී මොළය ඉවත් කරනු ලබන්නේ නාස්පුඩුවලට දමන ලද කොක්කක් මගිනි. ඒ නිසා මොළය තිබෙන තැන ඇත්තේ හිස්තැනකි. මොළය මියගිය විට ද මේ හා සමාන තත්ත්වයක් පවතී. හිස්කබල තුළ මොළය තිබුණ ද එය වැඩකරන්නේ නැත. මේ රෝගියාගේ වැඩකරන එකම ප්‍රධාන ඉන්ද්‍රිය වන්නේ හදවත පමණි. මොළය මියගිය රෝගියකු Life Saving Mechine එකකට සවි කළ යුතුය. එය ඉවත් කළ සැණින් හුස්ම ගැනීමට නොහැකි වී රෝගියාගේ මුළු ශරීරයම අභාවයට පත් වෙයි. සාමාන්‍යයෙන් මොළය මියගිය රෝගියකුගේ සෙසු නිරෝගී අවයව වන ඇස්, හදවත, වකුගඩු, අක්මාව වැනි වැදගත් කොටස් ඉවත් කර වෙන කෙනකුට බද්ධ කළ හැකිය. මෙවැනි බද්ධ කිරීම් ලංකාව තුළත්, ලොව පුරාත් නිතර සිදුවෙයි. සාමාන්‍යයෙන් මොළය ආශ්‍රිත ස්නායු සැත්කමක් යනු රුපියල් මිලියන හත අටක් වැයවන සැත්කමකි. පෙර කී වෛද්‍යවරිය මොළය මියගිය රෝගියාට ස්නායු සැත්කම කිරීමෙන් දෙවියන්ගේ චරිතය රඟපෑමට ගිය නමුත් අන්තිමට මාරයාගේ චරිතය රඟපා ඇති අතර, මේ වනවිට කූඩුවට ගොස් සිටී. ඇය මොළය මියගිය රෝගියකුට සැත්කමක් කළ බව අපරාධ පරීක්‍ෂණ දෙපාර්තමේන්තුව විසින් පෙරේදා උදයේ අධිකරණයට දන්වන ලදී. මේ නිසා ඒ කතන්දරයේ සම්පූර්ණ වගකීම අපරාධ පරීක්‍ෂණ දෙපාර්තමේන්තුවට හිමිවන අතර අනාගතයේ දී මේ සම්බන්ධයෙන් ලෙඩක් වැටුණොත් ඒ ගින්න අපට පත්තු නොකළ යුතුය.
ලංකාවේ සෞඛ්‍යය බලවත් ප්‍රශ්නයක් බවට පත් වෙමින් තිබේ. එය මේ ආණ්ඩුවේ වරදක් නොවන බව අපි කියන්නේ, ආණ්ඩුව ෂේප් කර ගැනීමට නොව ඇත්ත කතාව එය නිසාය. මීට පෙර පැවැති ආණ්ඩුවේ සෞඛ්‍ය ඇමැතිතුමා හිරේ යමින් ද හිරෙන් එමින් ද කාලය ගතකරයි. ඔහුට විරුද්ධව චෝදනා විශාල ප්‍රමාණයක් තිබේ. එන්නත් කුප්පිවලට වතුර පුරවා ඒවා විශාල මිල ගණන්වලට අලෙවි කිරීම සහ ව්‍යාජ බෙහෙත් මිලදී ගැනීම එකී චෝදනා ය. හැබැයි ඔහුට එරෙහි නඩුව නිමාවට පත්ව නැති බැවින් සැකයේ වාසිය විත්තියට ලැබෙන අතර, අධිකරණයෙන් උත්තරයක් ලැබෙනතුරු ඔහු තවමත් නිවැරදිකරුවෙකි. ලංකාවේ බෙහෙත් ප්‍රශ්නය දීර්ඝකාලීන ප්‍රශ්නයකි. ඒ ප්‍රශ්නය ඇති නොවීම පිණිස ලංකාව තුළම ප්‍රමිතිගත ඖෂධ නිෂ්පාදනය කිරීම සඳහා මහාචාර්ය සේනක බිබිලේ විසින් ඖෂධ ප්‍රතිපත්තියක් සාදා තිබිණ. රාජ්‍ය ඖෂධ සංස්ථාවේ පළමු වන සභාපති වූ හෙතෙම ඉතා අබිරහස් ලෙස මළේ ය. බහුජාතික ඖෂධ සමාගම් විසින් ඔහුට වස දුන් බව දැනගන්නට තිබේ. මෙවැනි සිද්ධීන් ඕනෑතරම් ලොව පුරා රටවලින් වාර්තා වී ඇත. වරක් විදේශ සංචාරයකට සහභාගි වූ ඊජිප්තුවේ ජනාධිපති ගමාල් අබ්දුල් නසර්, සංචාරය නිමවා ගෙදර පැමිණි පසු හදිසියේ මළේ ය. මරණ පරීක්‍ෂණයේ දී හෙළි වූයේ ඔහුගේ ශරීරයට විසක් ඇතුළත් වූ බවය. අබ්දුල් නසර්ට හතුරෝ බොහෝ සිටියහ. සමහර විට ඔහුගෙන් නිදහස්වීම සඳහා ඒ කට්ටිය ගේමක් ගහන්නට ඇති. මේ වැඩේ සිද්ධ වෙන්නට ඇත්තේ ජනාධිපති නසර් පෙර කී විදේශ සංචාරයේ දී සම්බාහනාගාරයකට යෑමෙන් පසු යැයි සැකයක් පවතී. එතැන සිටි ‘ළමයින්’ ඔහුගේ ශරීරයට විස කාන්දු කරන්නට ඇති. පලස්තීන විමුක්ති සංවිධානයේ නායක යසර් අර්ෆත්ට සිදුවූයේ ද මේ හා සමාන දෙයකි. විදේශ සංචාරයකට සහභාගි වී සිය රට පැමිණි අර්ෆත්ට පිළිකාවක් වැලඳිණ. පසුව ඔහු මළේ ය. ඔහුගේ ශරීරයේ පිළිකාවට ප්ලූටෝනියම් නමැති විකිරණශීලී ද්‍රව්‍ය හේතු වූ බව මරණ පරීක්‍ෂණයේ දී හෙළි විය. ඔහුගේ ඇඟට ප්ලූටෝනියම් ගියේ විදේශ සංචාරයේ දී පුද්ගලයන් කිහිපදෙනකු විසින් ඔහුට අතට අත දී ආචාර කිරීම නිසාය. මේ අයගේ අත්වල ප්ලූටෝනියම් තවරා තිබූ බවට සැකයක් පවතී.
සේනක බිබිලේ ජීවතුන් අතර සිටියේ නම් අද පිටරටින් ගෙන්වන ඖෂධ බොහොමයක් මේ රටේම නිපදවා ගැනීමට තිබිණ. කෙහෙළිය රඹුක්වැල්ල සෞඛ්‍ය ඇමැතිතුමා විසින් පිටරටින් ගෙන්වූ ප්‍රශ්නගත එන්නත් කුප්පි කිසිම ප්‍රශ්නයක් ඇති නොවන පරිදි නිෂ්පාදනය කර ගැනීමට එසේ නම් ලංකාවට හැකි වන්නේය.
ශ්‍රී ලංකා ඖෂධ සංස්ථාව මගින් මේ වනවිටත් සෑහෙන තරම් ඖෂධ ප්‍රමාණයක් නිෂ්පාදනය කරයි. මේ ඖෂධ සියල්ලම එන්නේ ඒවායේ රසායනික නාමයෙන් මිස වෙළඳනාමවලින් නොවේ. එහෙත් එම ඖෂධ බැහැරකොට, එම ඖෂධවලම පිටරටින් එන කීර්තිමත් අනුපිටපත් පාවිච්චි කරන ලෙසට චැනල් දොස්තරලා උපදෙස් දෙති. ඖෂධ සංස්ථාවේ පැරසිටමෝල් පෙත්තක් රුපියලක් නම් එම ඖෂධයේ කීර්තිමත් එංගලන්ත නිෂ්පාදනය රුපියල් සියයකි. මේ ඖෂධ නිර්දේශ කිරීමෙන් දොස්තරට කොමිස් කුට්ටියක් ලැබෙයි. පිටරට ගමන්වලදී ක්ලබ්වලට ගොස් ෆන් ගැනීමේ දී මේ කොමිස් කුට්ටිය පාවිච්චි කිරීමට දොස්තරට පුළුවන. දොස්තර රට ගිය විට පිටරට දී එම කුට්ටිය ලැබෙන නිසා විදේශ විනිමය ප්‍රශ්නයක් ද මතු නොවේ. මේ රටේ ඇතැම් රෝහල්වල අද ඇත්තේ දොස්තරලාත්, නර්ස්ලාත්, ඇඳන් ටිකත්, ලෙඩ්ඩුත් පමණි. අවශ්‍ය බෙහෙත් ෆාමසියේ තිබේ. මෙය සෞඛ්‍ය ඇමැති නලින්ද ජයතිස්සගේ පාලනයෙන් තොර වැඩකි. මේ දුෂ්ට ක්‍රියාවලියට නිර්භය ලෙස පහරදීම මහජන ඡන්දයෙන් බලයට පැමිණි සෞඛ්‍ය ඇමැති නලින්ද ජයතිස්සගේ යුතුකමකි.
