ඉකුත් ජුනි 12 වැනිදා ඉන්දියාවේ අහමදාබාද් නගරයේ සිට එංගලන්තයේ ලන්ඩන් නගරය බලා පියාසර කිරීමට යෑමේදී කඩා වැටුණු ‘එයාර් ඉන්ඩියා’ ගුවන් සේවයට අයත් ඩී්‍රම්ලයිනර් මගී ගුවන් යානයේ කළු පෙට්ටි දෙක වැඩිදුර විශ්ලේෂණය සඳහා විදෙස් රටකට යැවීම කෙරෙහි ඉන්දීය බලධාරීන්ගේ අවධානය යොමුව ඇති බව විදෙස් මාධ්‍ය විසින් වාර්තා කර තිබේ.
ගුවන් මගීන් 241 දෙනකු ඇතුළු 270 දෙනකුට පමණ මරු කැඳවමින් සිදුවූ අදාළ ගුවන් යානා අනතුරට මුල් වූ හේතුව මෙතෙක් අනාවරණය වී නොමැති අතර අනතුරට පත් ගුවන් යානයේ දත්ත හා ගුවන් නියමු මැදිරියේ පටිගත හඬ පටයන් සොයාගෙන ඇතත් ඒවා විදෙස් රටකට යවා වැඩිදුරටත් විශේලේෂණය කරනවද යන්න පිළිබඳව තවමත් අවසන් තීරණයක් ගෙන නොමැති බව ඉන්දීය ගුවන් යානා විමර්ශන කාර්යාංශය විසින් පවසා තිබේ.
මේ අතර දැනටමත් ගුවන් යානයේ කළු පෙට්ටි දෙක විදෙස් රටවලට යවා ඇති බවට ඇතැම් ඉන්දීය මාධ්‍යවල පළව ඇති වාර්තා ඉන්දීය සිවිල් ගුවන් සේවා අමාත්‍යාංශය විසින් ප්‍රතික්ෂේප කර තිබේ. තාක්ෂණික ආරක්ෂාව හා ආරක්ෂක කටයුතු සම්බන්ධයෙන් නියමිත තක්සේරුව සිදු කිරීමෙන් පසු අදාළ අනතුරට පත් ගුවන් යානයේ කළු පෙට්ටි දෙක විමර්ශනය සඳහා යොමු කරන දිශාව ඉන්දීය ගුවන් යානා විමර්ශන කාර්යාංශය විසින් තීරණය කරනු ඇතැයි අමාත්‍යාංශය විසින් වැඩිදුරටත් සඳහන් කර තිබේ. මේ අතර ඇතැම් ඉන්දීය මාධ්‍ය විසින් අනතුරට පත් ගුවන් යානයේ කළු පෙට්ටි දෙකම අනතුරෙන් හටගත් ගින්නට හසු වීමෙන් දැඩි හානියට පත්ව ඇති බව වාර්තා කර තිබේ.
