රුවන්වැල්ල ප්‍රාදේශීය සභාවට සමගි ජනබලවේගයෙන් සභිකයන් අට දෙනකු පත්වී ඇතත් ඔවුන්ගේ නම් මේ වනතුරු ගැසට් කර නොතිබීම නිසා සභාව නියෝජනය කිරීමට නොහැකි වී ඇති බව රුවන්වැල්ල ප්‍රාදේශීය සභාවේ ලේකම් රසාංගික පතිරණ මහතා පැවසීය.
මේ වන විට සභාවට නව සභාපතිවරයකු තෝරා පත්කරගෙන විශේෂ සභා රැස්වීමක් හා සභිකයන් උදෙසා පුහුණු වැඩමුළුවක්ද පවත්වා ඇතැයි ඒ මහතා පැවසීය.
ලේකම්වරයා පවසා සිටියේ ප්‍රාදේශීය සභාවට ජාතික ජනබලවේගයෙන් සභිකයන් 17 දෙනකු පත්වී සිටින බවය. එසේම සමගි ජනබල වේගයෙන් 08 දෙනකු ද ශ්‍රී ලංකා පොදුජන පෙරමුණෙන් තිදෙනකු ද එජාපයෙන් සර්ව ජනබලයෙන් හා පොදුජන එක්සත් පෙරමුණෙන් මෙන්ම ස්වාධීන එක් අයකු බැගින්ද පත්වී සිටින බවය. ඒ අනුව සෙසු පක්ෂ නියෝජනය කරන සභිකයන් සංඛ්‍යාව 15 කි.
මේ අතර පසුගිය ජූනි 12 දින සභාපති දර්ශන වෛද්‍යරත්න මහතාගේ ප්‍රධානත්වයෙන් විශේෂ සභා රැස්වීමක් පැවැත්වීමෙන් පසු සභිකයන් සඳහා දැනුවත් කිරීමේ වැඩමුළුවක් පැවැත්වූ බවද එහිදී සභා කටයුතු හා සභිකයන්ගේ කාර්ය භාරය පිළිබඳව දැරණියගල ප්‍රාදේශීය සභාවේ ලේකම් නලීන් පුෂ්පකුමාර මහතා විසින් සභිකයන් දැනුවත් කිරීමක් කළ බවද ඒ මහතා කීය. එහිදී නම් ගැසට් කර නොතිබීම නිසා ස.ජ.බ. සභිකයන්ට එම අවස්ථාව අහිමි වී ගිය බවද ලේකම්වරයා වැඩිදුරටත් පැවසීය.
රුවන්වැල්ල – විමලරත්න සමරක්කොඩි
