හදිසි මරණ පරීක්ෂකවරුන් 600කට අධික සංඛ්‍යාවක් මරණ පරීක්ෂක කටයුතු සිදුකිරීමේදී නිසි පහසුකම් නොමැතිවීම හේතුවෙන් දුෂ්කරතා රැසකට මුහුණපා ඇතැයි ශ්‍රී ලංකා හදිසි මරණ පරීක්ෂකවරුන්ගේ සංගමයේ භාණ්ඩාගාරික විපුල නරසිංහ මහතා “දිවයින ඉරිදා සංග්‍රහය”ට පැවසීය.
හදිසි මරණ පරීක්ෂකවරුන්ගේ වර්තමානයේ මුහුණ පා ඇති ගැටලු පිළිබඳව අධිකරණ අමාත්‍යවරයා වෙත ලිඛිතව දැනුම් දී ඇතත් මෙතෙක් ඒවාට විසඳුම් ලැබී නොමැති බවද ඒ මහතා කියා සිටියේය.
තමන් විසින් සිදුකරනු ලබන මරණ පරීක්ෂණ සඳහා ගෙවීමේ ප්‍රමාදයන් ද ඇතැයි ඒ මහතා කීය. මේ වනවිට සැතපුමකට ගමන් වියදම් දීමනාව වශයෙන් ලැබෙන්නේ රුපියල් 4ක් වැනි සොච්චම් මුදලක් බවද හෙතෙම කියා සිටියේය.
එක් මරණ පරීක්ෂණයක් සිදුකිරීම සඳහා මරණ පරීක්ෂකවරයකුට වසර ගණනක සිට ගෙවනුයේ රුපියල් 1000ක් බවත්, එය රුපියල් 2500 දක්වා වැඩි කරදෙන ලෙස ඉල්ලා ඇතත් මෙතෙක් එම මුදල වැඩිකර නොමැති බවත් හෙතෙම කීය.
මරණ පරීක්ෂකවරුන්ගේ ආරක්ෂාව වෙනුවෙන් රක්ෂණාවරණයක් ඉල්ලා ඇතත් එය මෙතෙක් ලබාදීමට රජය කටයුතු කර නොමැති බවද ඒ මහතා කියා සිටියේය.
මරණ පරීක්ෂකවරුන්ට ග්‍රාමීය රෝහල්වල මරණ පරීක්ෂණ සිදුකිරීමේදී අඩුම වශයෙන් එම සාක්ෂි ලිවීමට පුටුවක් මේසයක්වත් නොමැති බවද ඒ මහතා කීය.
ග්‍රාමීය වශයෙන් මරණ පරීක්ෂණ සිදුකිරීමට හදිසි මරණ පරීක්ෂකවරුන්ට කිලෝමීටර් ගණන් යෑමට සිදුවට ඇති බවත්, ඒ සඳහා තම අතින් මුදල් වියදම් කරගෙන යෑමට සිදුව ඇති බවත් ඒ මහතා කියා සිටියේය.
හදිසි මරණ පරීක්ෂකවරුන්ට පවතින ගැටලු ගැන දැන්වත් අවධානය යොමුකර විසඳුම් ලබාදෙන්නැයි ඒ මහතා වත්මන් රජයෙන් ඉල්ලා සිටියි.
ප්‍රදීප් ප්‍රසන්න සමරකෝන් ✍️
මරණ පරීක්‍ෂකවරු දුෂ්කරතාවල
