මෙරට බන්ධනාගාරවල රඳවා සිටින සිරකරුවන් නඩත්තු කිරීම සඳහා වසරකට රුපියල් බිලියන 20 කට (කෝටි 2000 කට) ආසන්න මුදලක් වැය වන බව බන්ධනාගාර දෙපාර්තමේන්තුව පවසයි. මින් රුපියල් බිලියන 07 ක් (කෝටි 700ක්) පමණ වැය වන්නේ සිරකරුවන්ට අවශ්‍ය ආහාරපාන ලබා දීම සඳහා බවද බන්ධනාගාර දෙපාර්තමේන්තුව පෙන්වා දෙයි.
බන්ධනාගාර දෙපාර්තමේන්තුවට අයත් බන්ධනාගාරවල රඳවා තැබිය හැක්කේ සිරකරුවන් 11000ක් පමණ බවත් මේ වනවිට සිරකරුවන් 30110ක් පමණ රඳවා සිටින බවත් බන්ධනාගාර දෙපාර්තමේන්තුව පවසයි. මින් වැඩිම සංඛ්‍යාවක් රිමාන්ඩ් සිරකරුවන් වන අතර එම සංඛ්‍යාව 21448කි.
දඬුවම් ලබන සිරකරුවන් සංඛ්‍යාව 8662කි. වැලිකඩ බන්ධනාගාරයේ රැඳවිය හැකි සිරකරුවන් සංඛ්‍යාව 1500ක් පමණ වුවද මේ වනවිට එහි සිරකරුවන් 3500ක් පමණ රඳවා සිටින බවද බන්ධනාගාර දෙපාර්තමේන්තුව පෙන්වා දෙයි.
වැඩිම පිරිසක් මත්ද්‍රව්‍ය සම්බන්ධයෙන් අත්අඩංගුවට ගත් සිරකරුවන් බවත් නඩු හා රස පරීක්ෂක වාර්තා ලැබීම ප්‍රමාද වීම නිසා රිමාන්ඩ් සිරකරුවන්ගේ සංඛ්‍යාව වැඩිවී ඇති බවත් රිමාන්ඩ් සිරකරුවන්ගේ සංඛ්‍යාව අඩු කිරීමට අවශ්‍ය ක්‍රියාමාර්ග ගෙන ඇති බවත් අධිකරණ අමාත්‍යාංශය පවසයි.
ලලිත් චාමින්ද ✍️
