ගෙවී ගිය 2024 වසරේදී දේශීය මෙන්ම ජාත්‍යන්තර ක්‍රිකට් පිටිය තුළ දරන ලද සියලු කැපකිරීම් සහ වෙහෙස මහන්සිය වෙනුවෙන් ක්‍රීඩක ක්‍රීඩිකාවන් ගෞරවයට පාත්‍ර කෙරෙන ‘හෝම් ලෑන්ඩ් ශ්‍රී ලංකා ක්‍රිකට් සම්මාන 2024’ ප්‍රධානෝත්සවය තවත් හෝරා කීපයකින් හෙවත් අද (ජුනි 09 වැනිදා) ප. ව. 7.00 කණිසම වදිනවාත් සමගම කොළඹ දී ආරම්භ වනු ඇත.
‘හෝම් ලෑන්ඩ්’ සමාගම් සමූහයේ ප්‍රධාන අනුග්‍රහය ඇතිව ශ්‍රී ලංකා ක්‍රිකට් ආයතනය විසින් සංවිධානය කරනු ලබන මෙවර ක්‍රිකට් සම්මාන ප්‍රධානයේදී පිරිනැමෙන සමස්ත සම්මාන සංඛ්‍යාව 46 ක් වේ. එහිදී ජාත්‍යන්තර තරග පිටිය නියෝජනය කරන ලද ක්‍රීඩක ක්‍රීඩිකාවන් 18 දෙනකු සම්මාන ලබද්දී දේශීය තරග අංශය යටතේ සම්මාන 20 ක් පිරිනැමෙනු ඇත.
මෙම සම්මාන ප්‍රදානයේදී දක්ෂතම දේශීය තරග විනිසුරුවරයාට මෙන්ම තරග තීරකවරයාටද සම්මාන පිරිනැමීමට නියමිතය. මීට අමතරව ශ්‍රී ලංකාවේ ක්‍රිකට් ක්‍රීඩාව වෙනුවෙන් තම ජීවිතයෙන් වැඩි කාලයක් ඒ සඳහා කැප කළ මාධ්‍යවේදීන් දෙදෙනකු ද ඇතුළත්ව පුද්ගලයන් හය දෙනකු ද මෙවර සම්මාන ප්‍රදානයේදී ඇගැයීම් සම්මාන පිරිනැමෙනු ඇත.
විචිත්‍රවත් අංග රැසකගෙන් සමන්විතව පැවැත්වෙන මෙවර සම්මාන ප්‍රධානයේදී ප්‍රධාන ආරාධිතයා ලෙසින් ක්‍රීඩා අමාත්‍ය සුනිල් කුමාර ගමගේ මහතා සහභාගිවනු ඇත. මීට අමතරව එදා මෙදා තුර ශ්‍රී ලංකා ක්‍රිකට් කණ්ඩායම නියෝජනය කරන ලද හිටපු ක්‍රීඩකයන් මෙන්ම ශ්‍රී ලංකාවේ විවිධ ආයතනික අංශ නියෝජනය කරනු ලබන ව්‍යවසායකයන් රැසක්ද මෙම අවස්ථාවට සහභාගිවීමට නියමිතය.
පිරිනැමීමට නියමිත සම්මාන සහ නිර්දේශිත නාමයන්
ජාත්‍යන්තර – පිරිමි අංශය
සම්මානය
නිර්දේශිත නාමයන්
වසරේ නැඟී එන ක්‍රීඩකයා – මිලාන් රත්නායක, නිශාන් පීරිස්, ජනිත් ලියනගේ
වසරේ දක්ෂතම ටෙස්ට් පිතිකරුවා – ධනංජය ද සිල්වා, කමිඳු මෙන්ඩිස්, දිනේෂ් චන්දිමාල්
වසරේ දක්ෂතම ටෙස්ට් පන්දු යවන්නා – අසිත ප්‍රනාන්දු, ප්‍රභාත් ජයසූරිය, ළහිරු කුමාර
වසරේ දක්ෂතම ටෙස්ට් තුන් ඉරියව් ක්‍රීඩකයා – මිලාන් රත්නායක, ධනංජය ද සිල්වා
වසරේ දක්ෂතම එක්දින පිතිකරුවා – චරිත් අසලංක, පැතුම් නිස්සංක, ජනිත් ලියනගේ
වසරේ දක්ෂතම එක්දින පන්දු යවන්නා – මහීෂ් තීක්ෂණ, වනිඳු හසරංග, ජෙෆ්රි වැන්ඩර්සි
වසරේ දක්ෂතම එක්දින තුන් ඉරියව් ක්‍රීඩකයා – චරිත් අසලංක, වනිඳු හසරංග, දුනිත් වෙල්ලාලගේ
වසරේ දක්ෂතම විස්සයි-20 පිතිකරුවා – කුසල් මෙන්ඩිස්, ඇන්ජලෝ මැතිව්ස්, පැතුම් නිස්සංක
වසරේ දක්ෂතම විස්සයි-20 පන්දු යවන්නා – මහීෂ් තීක්ෂණ, මතීෂ පතිරණ, වනිඳු හසරංග
වසරේ දක්ෂතම විස්සයි-20 තුන් ඉරියව් ක්‍රීඩකයා – ඇන්ජලෝ මැතිව්ස්, වනිඳු හසරංග
ජාත්‍යන්තර – කාන්තා අංශය
වසරේ දක්ෂතම එක්දින පිතිකාරිණිය – විශ්මි ගුණරත්න, චමරි අතපත්තු, හර්ෂිතා සමරවික්‍රම
වසරේ දක්ෂතම එක්දින පන්දු යවන්නිය – කවීෂා දිල්හාරි, අචිනි කුලසූරිය, චමරි අතපත්තු
වසරේ දක්ෂතම එක්දින තුන් ඉරියව් ක්‍රීඩිකාව – කවීෂා දිල්හාරි, චමරි අතපත්තු, හර්ෂිතා සමරවික්‍රම
වසරේ දක්ෂතම විස්සයි-20 පිතිකාරිණිය – චමරි අතපත්තු, හර්ෂිතා සමරවික්‍රම, විශ්මි ගුණරත්න
වසරේ දක්ෂතම විස්සයි-20 පන්දු යවන්නිය – කවීෂා දිල්හාරි, ඉනෝෂි ප්‍රනාන්දු, චමරි අතපත්තු
වසරේ දක්ෂතම විස්සයි-20 තුන් ඉරියව් ක්‍රීඩිකාව – කවීෂා දිල්හාරි, චමරි අතපත්තු, හර්ෂිතා සමරවික්‍රම
සංස්කරණය – සුසිල් ජයකොඩි
