කඩුලු 7ක ජයක් සමග පන්ජාබ් අංක එකට
ජොස් ඉංග්ලිෂ් ගේ සහ ප්‍රියන්ෂ් ආර්යා ගේ විශිෂ්ට පිතිහරඹයත්, පන්ජාබ් කිංග්ස් පන්දු බලඇණියේ කැපී පෙණෙන පන්දු යැවීමත් හේතුවෙන් ඉන්දීය ප්‍රිමියර් ලීග් තරගාවලියේ 69වන තරගය වූ පන්ජාබ් කිංග්ස් කණ්ඩායම සහ මුම්බායි ඉන්දියන්ස් කණ්ඩායම අතර තරගයෙන් කඩුලු 7ක ජයක් සමග ප්‍රසාද ලකුණු සටහනේ අංක 1 ස්ථානය හිමිකර ගැනීමට පන්ජාබ් කිංග්ස් කණ්ඩායම සමත්විය.
පෙරේදා (26දා) ජයිපූර් හිදී පැවැති මෙම තරගයේ පළමුව පන්දුවට පහර දුන් මුම්බායි ඉන්දියන්ස් කණ්ඩායම නියමිත පන්දුවාර 20 අවසානයේ කඩුලු 7ක් දැවී ලකුණු 184ක් ලබාගැනීමට සමත් වුවද, ලකුණු 185ක අභියෝගයක් හඹා යෑම සඳහා පිටියට පිවිසි පන්ජාබ් කිංග්ස් කණ්ඩායම පන්දුවාර 18යි පන්දු 3ක් අවසානයේ කඩුලු 3ක් පමණක් දැවී ලකුණු 187ක් ලබාගනිමින් තරගයේ ජය වාර්තා කිරීමට සමත්විය.
මුම්බායි කණ්ඩායම වෙනුවෙන් පන්දුවට පහර දීමේදී සූර්යකුමාර් යාදෙව් ලකුණු 57ක්, රයන් රිකිල්ටන් ලකුණු 27ක්, හර්දික් පාණ්ඩ්‍යා ලකුණු 26ක් සහ රෝහිත් ශර්මා ලකුණු 24ක් ලැබීය.
පන්දු යැවීමේදී අර්ෂ්දීප් සිංග් ලකුණු 28කට කඩුලු 2ක්, මාකෝ ජැන්සන් ලකුණු 34කට කඩුලු 2ක් සහ විජයකුමාර් විශාක් ලකුණු 44කට කඩුලු 2ක් බිඳහෙලීය.
පන්ජාබ් කිංග්ස් වෙනුවෙන් පන්දුවට පහරදීමේදී කණ්ඩායමේ ජයග්‍රහණය විවර කරමින් විශිෂ්ට පිතිහරඹයක නිරත වූ ජොස් ඉංග්ලිෂ් පන්දු 42කට මුහුණ දෙමින් හයේ පහර 3ක් සහ හතරේ පහර 9ක් සමගින් ලකුණු 73ක් සහ ප්‍රියන්ෂ් ආර්යා පන්දු 35කින් ලකුණු 62ක් ලබාගැනීමට සමත්වූ අතර, ඔහුගේ ඉනිමට හයේ පහර 2ක් සහ හතරේ පහර 9ක් ඇතුළත්ව තිබිණි. ඊට අමතරව නායක ශෙයාර්ෂ් අයියර් නොදැවී ලකුණු 26ක් ලබාගැනීමට සමත්විය.
පන්දු යැවීමේදී මිචෙල් සැන්ට්නර් ලකුණු 41කට කඩුලු 2ක් දවාලීය.
තරගයේ වීරයා ලෙස ජොස් ඉංග්ලිෂ් සම්මාන ලැබීය.
සිසිර ඉන්ද්‍රජිත්
