දුම්මලසූරිය කොහු මෝලක වැඩ කළ තැනැත්තා දැලේ
කුලියාපිටිය උපේන්ද්‍ර සේරසිංහ දුරකථනයෙන් වෙනත් පෙම් පලහිලව් ඇතැයි සැක සිතා කුළුගෙඩියකින් පහරදී අනියම් බිරිඳ ඝාතනය කර ප්‍රදේශය පලා ගොස් සිටි අයකු කුලියාපිටිය කොට්ඨාස අපරාධ විමර්ශන කාර්යංශය මගින් අත්අඩංගුවට ගෙන තිබේ.
එසේ අත්අඩංගුවට ගැනුණේ යගම්වෙල, මණ්ඩකොණ්ඩාන දුම්මලසූරිය කොහුමෝලක සේවය කරමින් සිටි මල්විල සේනපුර වැලිකන්ද ලිපිනයේ පදිංචි කලක සිවිල් ආරක්‍ෂක බලකායේ සේවය කළ අයෙකි.
සැකකරු මීට පෙර ද වැලිකන්ද ප්‍රදේශයේ පදිංචිව සිට සිය බිරිඳ වෙනත් පුරුෂයකු සමගින් නිදි යහනේ සිටියදී බිරියගේ ගෙල වෙන්ව යාමට කපා ඝාතනයකර තිබිණි. සෙසු පුද්ගලයාට එල්ල කර තිබූ මන්නා පහරින් අත් වෙන්ව ගොස් තිබුණ ද පලාගොස් දිවි ගලවා ගෙන ඇති බවට පොලිසියට තොරතුරු ලැබී තිබිණි. ඉන් අනතුරුව සැකකරු ප්‍රදේශය හැරදා කුලියාපිටිය දුම්මලසූරිය ප්‍රදේශයේ කොහු මෝලක සේවය කරමින් සිටියදී මෙලෙස මැයි මස 23 දා අනියම් බිරිඳගේ හිසට කුළුගෙඩි පහරක් එල්ල කර ඝාතනය කර තිබිණ.
දුම්මලසූරිය පොලිසිය සැකකරු අත්අඩංගුවට ගැනීමට විමර්ශන ක්‍රියාත්මක කර ඇති අතරවාරයේ කොට්ඨාස අපරාධ විමර්ශන ඒකකයට ලද තොරතුරක් මත දින කිහිපයක් නාත්තන්ඩිය, මාරවිල, ආදී ප්‍රදේශවල විවිධ උපක්‍රම යොදා කළ විමර්ශනයේ දී වෙන්නප්පුව ප්‍රදේශයේ කොහු මෝලක සිටියදී සැකකරු අත්අඩංගුවට ගෙන ඇත. සැකකරු පදවිය මහෙස්ත්‍රාත් අධිකරණය ඇතුළු අධිකරණ කිහිපයකින් වරෙන්තු නිකුත් කළ අයකු බව ද පොලිසිය කියයි. සැකකරු අධිකරණ කටයුතු සඳහා දුම්මලදූරිය පොලිසියට භාර දී තිබිණි.
වයඹ පළාත් භාර ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතාගේ හා කුලියාපිටිය වැඩබලන කොට්ඨාස භාර නිලධාරි සහකාර පොලිස් අධිකාරි වසන්ත හේරත් මහතාගේ උපදෙස් අනුව වැඩබලන කොට්ඨාස අපරාධ විමර්ශන ඒකකයේ ස්ථානාධිපති පොලිස් සැරයන් ෆැන්සිස් (7015), චමිල (37525), ප්‍රියදර්ශන (53311), රෝහණ (56807), කොස්තාපල් වික්‍රමනායක යන නිලධාරීන් දින කිහිපයක් ඒ ඒ ප්‍රදේශවල රැඳී සිටිමින් සැකකරු අත්අඩංගුවට ගෙන තිබිණි.
