රජයේ පශු වෛද්‍ය නිලධාරීන්ගේ සංගමය අද (09දා) පෙරවරු 6.00 සිට පැය 24 ක සංකේත වැඩවර්ජනයක් ආරම්භ කරන බව එම සංගමයේ සභාපති වෛද්‍ය උපුල් රංජිත් මහතා කොළඹ පැවැති මාධ්‍ය හමුවකදී පැවැසීය.
රජය පශු වෛද්‍යවරුන් සඳහා වෙන්වූ සේවා ව්‍යවස්ථාවක් සකස් කිරීමට කටයුතු කර ඇති අවස්ථාවක එය කඩාකප්පල් කිරීමට කෘෂිකර්ම අමාත්‍යාංශයේ ලේකම්වරයා දිගින් දිගටම කටයුතු කිරීම හේතුවෙන් මෙලෙස වැඩවර්ජනයකට යෑමට තීරණය කළ බව හෙතෙම කියා සිටියේය.
මෙම වැඩවර්ජනය හේතුවෙන් රජයේ සියලුම පශු වෛද්‍ය කාර්යාලවල වැඩ අඩපන වන බවද හේ කීය.
ඒ අනුව සත්ත්ව උද්‍යාන දෙපාර්තමේන්තුව, වනජීවී දෙපාර්තමේන්තුව, වරායේ සහ ගුවන් තොටුපළේ සත්ත්ව නිරෝධායන මධ්‍යස්ථාන සහ පළාත් පාලන ආයතනවල පශු වෛද්‍යවරුන්ගේ සේවාවන් අඩාල වන බවද හේ කියා සිටියේය.
ප්‍රදීප් ප්‍රසන්න සමරකෝන් සහ චමින්ද සිල්වා
