තෝරාගත් පාසල්වලට දිවා ආහාරය දෙන්න
පාත්ෆයින්ඩර් පදනම ඉන්දියාවේ අක්ෂේයා පත්‍ර පදනම සමග අවබෝධතා ගිවිසුමක් පසුගියදා අත්සන් කෙරිණි. ඉන්දියාවේ බැංගලෝරය කේන්ද්‍ර කරගත් එම සංවිධානය ලාභ නොලබන ආයතනයකි. පාසල් දරුවන් සඳහා නොමිලේ ආහාර දිනපතා සපයන ලෝකයේ විශාලතම ආයතනය වන අක්ෂේයා පත්‍ර පදනම ඉන්දියාවේ ප්‍රාන්ත 16ක හා ප්‍රධාන නගර 3ක පාසල් 23,581ක පාසල් දරුවන් මිලියන 2.25කට නොමිලේ දිවා ආහාරය සපයන වැඩසටහන් ක්‍රියාත්මක කරයිග
මිලින්ද මොරගොඩ මහතා පසුගියදා බැංගලෝරයෙහි පිහිටි අක්ෂේයා පත්‍ර මුලස්ථානයේ දී එහි සභාපති මධු පණ්ඩිත් දාස් මහතා මුණ ගැසුණි. ශ්‍රී ලංකාවේ දී තෝරාගත් පාසල් කිහිපයක ආදර්ශ වැඩසටහනක් ලෙස දිවා ආහාරවේලක් සැපයීමට ඇති හැකියාව ගැන එහි දී සාකච්ඡා කර තිබේ. මෙම ගිවිසුම අනුව පාත්ෆයින්ඩර් පදනම කොළඹ නගරයේ තෝරාගත් පාසල් සඳහා දිවා ආහාර පිරිනමන ආදර්ශ ව්‍යාපෘතියක් ආරම්භ කිරීමට සැලසුම් කර ඇත.
ආහාර සකස් කිරීම හා බෙදාහැරීම සඳහා අවශ්‍ය අනුග්‍රහය සැපැයීම සඳහා අක්ෂෙයා පත්‍ර පදනම මෙම ගිවිසුම අනුව කැමැත්ත පළකොට ඇත. එම්.එම්.බී.එල්. පාත්ෆයින්ඩර් සමූහ ව්‍යාපාරයේ අධ්‍යක්ෂ සහ ප්‍රධාන විධායක කේග බාලසුන්දරම් සහ පාත්ෆයින්ඩර් පදනමේ සභාපති බර්නාඩ් ගුණතිලක යන මහත්වරු මෙම ගිවිසුමට පෑලියගොඩ පිහිටි පාත්ෆයින්ඩර් පදනම මුලස්ථානයේ දී අත්සන් කළ අතර ආක්ෂේයා පත්‍ර පදනම වෙනුවෙන් එහි විධායක නිලධාරීන්වන සංචලාපති දාස් සහ සිවා සුවීර් සනිදාස් යන මහත්වරු බැංගලෝර්හි කාර්යාලයේ සිට මෙම ගිවිසුමට අත්සන් තැබූහ.
