මාස දෙකකට ඉන්ධන සංචිත පවතින බව ප්‍රකාශ කළ රජය ඊයේ (01දා) සිට ඉන්ධන මිල වැඩිකළේ ජාත්‍යන්තර මූල්‍ය අරමුදලේ අවශ්‍යතාවටදැයි බලශක්ති ඒකාබද්ධ වෘත්තීය සමිති බලමණ්ඩලයේ මාධ්‍ය ප්‍රකාශක ආනන්ද පාලිත මහතා රජයෙන් විමසා සිටී.
රටට අවශ්‍ය ඉන්ධන තොග පැරණි මිලට ගෙන්වා තිබූ බවත් එම තොග වැඩි මිලට අලෙවි කිරීම නිසා ඉන්ධන සපයන විදෙස් සමාගම් තුන අධික ලාභයක් ලබාගන්නා බවත් හෙතෙම පවසයි. රටට ලැබී තිබෙන බොරතෙල් මගින් ඩීසල් සහ භූමිතෙල් නිෂ්පාදනය කරන කොළොන්නාව පිරිපහදුවේ එක් කොටසක් මාස කිහිපයක් තිස්සේ අක්‍රීයව පවතින බවත් එම නිසා දැවිතෙල් නිෂ්පාදනය වැඩි වී ඇති බවත් ඔහු කීය. එම කොටස අලුත්වැඩියා කළහොත් 92 පෙට්‍රල් සහ භූමිතෙල් මිල වැඩි කළ යුතු නොවන බවද ඔහු කීය.
ජුනි මාසයේ රටේ විදුලි බලය සියයට 70ක් පුනර්ජනනීය බලශක්තියෙන් නිෂ්පාදනය කර තිබෙන බවට විදුලිබල මණ්ඩලය පවසා තිබියදී ජාත්‍යන්තර මූල්‍ය අරමුදලේ අවශ්‍යතාව අනුව විදුලි බිල වැඩි කළ බවත් මේ වනවිට ආණ්ඩුව ඉන්ධනවලින් හා විදුලි බිලෙන් ජනතාව අපහසුතාවට පත්කරමින් සිටින බවත් පාලිත මහතා කීය.
රජයට නිසි වැඩපිළිවෙළක් නැති නිසා සහල් පොල් ඇතුළු අත්‍යවශ්‍ය භාණ්ඩ රැසක්ම විදෙස් රටවලින් ගෙන්වීමට සිදුව ඇති බවත් ඉන් විදේශීය සමාගම් පෝෂණය වන බවත් ආනන්ද පාලිත මහතා වැඩිදුරටත් කියා සිටියේය.
චමින්ද සිල්වා
