රජයට බදු ආදායම ඉහළ නංවා ගැනීම සඳහා අත්‍යවශ්‍ය කාරණයක්ව පවතින සුරාබදු දෙපාර්තමේන්තුවේ ආදායම් පරිපාලනය ඩිජිටල් කිරීම සඳහා සිදුකරන ප්‍රසම්පාදන ක්‍රියාවලිය කිසිදු පැහැදිලි හේතුවක් නොමැතිව නිලධාරීන් කිහිපදෙනකුගේ අවශ්‍යතාවය මත කල්දමමින් සිටින බවට වාර්තා වේ.
මෙම වසරේ අප්‍රේල් මාසයේදී පරිපාලනය ඩිජිටල් කිරීම සඳහා ටෙන්ඩර් (ලංසු) කැඳවා අවසන්ව ඇතත් නිලධාරීන් කිහිපදෙනාට හිතවත් ආයතන ඉදිරිපත් කළ ලංසු ප්‍රතික්‍ෂේප වීම නිසා ප්‍රසම්පාදන ක්‍රියාවලිය කල්දමමින් සිටින බව පුරාබදු දෙපාර්තමේන්තු අභ්‍යන්තර ආරංචි මාර්ග සඳහන් කරයි.
සුරාබදු දෙපාර්තමේන්තුව ඩිජිටල්කරණයට ලක් කිරීම ජාත්‍යන්තර මූල්‍ය අරමුදලේ ඉදිරි ප්‍රදානයන් ලබාගැනීමේදී ප්‍රමුඛ කාරණයක් ලෙස තිබියදීත් නිලධාරීන් කිහිපදෙනකු ප්‍රසම්පාදන ක්‍රියාවලිය අඩපණ කිරීමට උත්සාහ කළහොත් එහි අවාසිය ද ශ්‍රී ලංකා ආර්ථිකයට අහිත කර ලෙස බලපා හැකි බවද එම ආරංචි මාර්ග අවධාරණය කර සිටී.
බිලියන 03ක පමණ ආයෝජනයක් වන මෙම ඩිජිටල් ප්‍රසම්පාදන ක්‍රියාවලිය සඳහා ආයතන 12 ක් ලංසු ඉදිරිපත් කර ඇත. ඒ සඳහා එක් අයකු රුපියල් මිලියන 12 බැගින් ඇපකර තබා ඇත. මෙම ව්‍යාපෘතිය වසර දෙකක් ඇතුළත නිම කිරීමට නියමිතය. මේ සමගම මත්පැන් බෝතල්වලට දැනට අලවන එහි ප්‍රමිතිය, නිෂ්පාදිත දිනය ඇතුළු කරුණු ඇතුළත් ස්ටිකරය ද දෙපාර්තමේන්තුවේ පරිපාලන ඩිජිටල් ව්‍යාපෘතියට අදාළ කරගෙන වෙනස් කරන ලෙස ද සුරාබදු දෙපාර්තමේන්තු නිලධාරීන් ඉල්ලා තිබෙන බවද එම ආරංචි මාර්ග තවදුරටත් කීය.
මේ සම්බන්ධයෙන් සුරාබදු කොමසාරිස් ජනරාල් උදය කුමාර මහතාගෙන් සිදු කළ විමසීමේදී ඒ මහතා කියා සිටියේ ටෙන්ඩරයට ඉදිරිපත් වූ ආයතන 12න් දෙකක් ප්‍රතික්‍ෂේප වූ බවත්, ටෙන්ඩර් ක්‍රියාපටිපාටියෙන් පසුව සිදු කළ යුතු ක්‍රියාදාමයන් මේ වන විට සිදු කරමින් පවතින බවත්ය. ඉදිරි සති දෙක ඇතුළතදී පමණ මේ සම්බන්ධයෙන් ගන්නා ක්‍රියාමාර්ග ප්‍රසිද්ධ කිරීමට කටයුතු කළ හැකි බව ඔහු පැවැසීය.
චමින්ද සිල්වා
