රු. 30,000ක දඩයකුත් විශ්‍රාම වැටුපත් අහිමි වෙයි
ගසක් කැපීම සඳහා බලපත්‍රයක් නිකුත් කිරීමට තඹුත්තේගම මහවැලි කලාපයේ ඉඩම් හිමියකුගෙන් රුපියල් ලක්‍ෂයක අල්ලසක් ලබාගැනීමේ චෝදනාවට වරදකරු කරනු ලැබූ ඉඩම් නිලධාරියකුට කොළඹ මහාධිකරණ විනිසුරු සුජීව නිශ්ශංක මහතා ඊයේ (25දා) බරපතළ වැඩ සහිත වසර 22ක සිරදඬුවමක් නියම කළේය.
ඊට අමතරව වී. එම්. කමල් මංජුල නමැති එම විත්තිකරුට රුපියල් 30,000ක දඩයක් ද නියම කළ විනිසුරුවරයා අල්ලස් ලෙස ලබාගත් රුපියල් ලක්‍ෂය විත්තිකරුගෙන් දඩයක් ලෙස අයකර ගැනීමටත් නියෝග කළේය. අල්ලස් පනතේ 26 වැනි වගන්තිය අනුව රුපියල් ලක්‍ෂයක මුදල දඩයක් ලෙස අයකර ගැනීමට නියම කළ විනිසුරුවරයා අගතියට පත් ලී මෝල් හිමියාට රුපියල් ලක්‍ෂයක වන්දියක් ගෙවීමට ද විත්තිකරුට නියම කළේය. එකී දඩ හා වන්දි මුදල් නොගෙවන්නේ නම් ලිහිල් වැඩ සහිත වසර බැගින් වූ සිරදඬුවම් ද නියම කළ විනිසුරුවරයා වසර තුනක් වූ ලිහිල් සිරදඬුවම් කාලය ප්‍රධාන සිරදඬුවමට අමතරව ගෙවී යන පරිදි ලබාදිය යුතු බවට ද නියෝග කළේය. විශ්‍රාම යෑමට මාස හයක කාලයක් ඉතිරිව තිබියදී සිදුකළ එම වරදට වරදකරුවීම නිසා මේ වනවිට 67 හැවිරිදි වියේ පසුවන විත්තිකරුට හිමිවිය යුතු විශ්‍රාම වැටුප ද අහිමි වනු ඇත. ලැබුණ පැමිණිල්ලක් අනුව 2016.3.18 වැනිදා අත්අඩංගුවට ගෙන තිබූ විත්තිකරුට එරෙහිව චෝදනා හයක් යටතේ නඩු පවරා තිබූ අතර අල්ලස් හෝ දූෂණ විමර්ශන කොමිෂන් සභාව විසින් විත්තිකරුට එරෙහිව නඟා තිබූ චෝදනා හයම සාධාරණ සැකයෙන් ඔබ්බට ඔප්පුකොට ඇති බවට දීර්ඝ නඩු විභාගයකින් අනතුරුව විනිසුරුවරයා නිගමනය කළේය.
අල්ලස් හෝ දූෂණ විමර්ශන කොමිෂන් සභාවේ සහකාර අධ්‍යක්‍ෂ ජනරාල් අනුත්තරා ජයසිංහ මහත්මිය, සහකාර අධ්‍යක්‍ෂ (නීති) කසුන් ගුණවර්ණසූරිය මහතා සමග පැමිණිල්ල මෙහෙය වූහ. පෙරියන්කුලම ප්‍රදේශයේ පදිංචි එම්. කරුණාරත්න නමැති ලී මෝල් හිමියා එම පැමිණිල්ල සිදුකර තිබිණි.
ඒ. ජේ. ඒ. අබේනායක
