ඊශ්‍රායලයේ සිටින ශ්‍රී ලාංකිකයන්ට තානාපති කාර්යාලයෙන් දැනුම්දීමක්
ඊශ්‍රායලයේ පවතින යුධමය තත්ත්වය සැලකිල්ලට ගෙන එරට සිටින ශ්‍රී ලාංකිකයන්ට සිය ආරක්ෂාව සලසා ගැනීම සඳහා ක්‍රියා කළ යුතු ආකාරය පිළිබඳව එරට පිහිටි ශ්‍රී ලංකා තානාපති කාර්යාලය දැනුම්දීමක් සිදු කර තිබේ.
ඒ අනුව සතුරු පාර්ශ්වයන්ගෙන් එල්ල විය හැකි මිසයිල ප්‍රහාරයන්ගෙන් ආරක්ෂා වීම සඳහා ආරක්ෂිත කුටි ආසන්නයේ රැඳී සිටින ලෙසට උපදෙස් ලබාදී ඇති අතර, අවශ්‍ය අනිකුත් උපදෙස් ලබාගැනීම සඳහා තානාපති කාර්යාලයේ නිලධාරීන් පැය 24 පුරා දුරකථනයෙන් සම්බන්ධ කර ගත හැකි බවද දැනුම් දී තිබේ.
එරට ප්‍රවාහන කටයුතු නවතා ඇති බැවින් සියලු දෙනාට ආරක්ෂිත ස්ථාන කරා යන ලෙසට උපදෙස් ලබාදී ඇති බවත්, හදිසි අවස්ථාවක දී ගිලන් රථ සේවා ක්‍රියාත්මකව පවතින බවද තානාපතිවරයා දැනුම් දී තිබේ.
එසේම සෑම අවස්ථාවකදීම බීමට අවශ්‍ය ජලය හා වියළි ආහාර ළඟ තබා ගන්නා ලෙසත් ඖෂධ භාවිතා කරන පිරිස් නිරතුරුව ඒවා තමාගේ ආසන්න ස්ථානයක තබාගන්නා ලෙසත් තානාපති කාර්යාලය එරට සිටින ශ්‍රී ලාංකිකයන්ට වැඩිදුරටත් දන්වා තිබේ.
සුජීව තත්සර
