විපක්ෂ නායක සජිත් ප්‍රේමදාස රජයෙන් ඉල්ලා සිටී
නිසි පරීක්ෂණයකින් තොරව බහලු‍ම් 323ක් නිදහස් කිරීම ගැන අහක නොබලා විනිවිදභාවයෙන් යුත් අපක්ෂපාතී පරීක්ෂණයක් සිදු කර සත්‍ය තොරතුරු අනාවරණය කරන ලෙස විපක්ෂ නායක සජිත් ප්‍රේමදාස මහතා රජයෙන් ඉල්ලා සිටී.
විශේෂ ප්‍රකාශයක් කරමින් ඊයේ (09දා) හෙතෙම මේ බව කියූ අතර එහිදී මෙසේද කීය.
පසුගිය ජනවාරි මාසයේ රේගුව විසින් රතු අවදානම් සහිත බහලු‍ම් 323ක් කිසිදු පරීක්ෂාවකින් තොරව නිදහස් කිරීම ගැන බරපතළ ආන්දෝලනාත්මක තත්ත්වයක් ඇති වුණා. මෙම චෝදනාව මුලින්ම ගෙන ආවේ දේශපාලනඥයන් නොව රේගු වෘත්තීය සමිති සන්ධාය බවත් රේගු මාණ්ඩලික නිලධාරීන්ගේ සංගමය ජ්‍යෙෂ්ඨ රේගු අධිකාරීවරුවන් ඇතුළු රේගුව නියෝජනය කරන බහුතර කණ්ඩායම්.
මෙම බහලු‍ම් නිදහස් කිරීම තුළ රටට ලැබිය යුතු ආදායම් අහිමි වීම, තහනම් භාණ්ඩ මුදා හැරීම මෙන්ම කෘත්‍රීම ගැටලු‍වක් ඇතිව තිබෙනවා. මීට පෙර දණ්ඩනයට ලක්වූ කණ්ඩායම්වල බහාලු‍ම්ද ඇති බවත් මේ ගැන රජයෙන් ප්‍රතිචාර නොමැති බවත් කමිටු පත් කර පර්යේෂණ කරනවා කිව්වත් තවමත් කිසිවක් සිදු නොවන බව පෙනෙනවා. මෙම පරීක්ෂණයේ විනිවිදභාවය ගැන ගැටලු ඇති බව පෙනෙන්න තිබෙනවා. මේ ගැටලු‍ව ගැන රජයේ වගවීම සහ වගකීම සිදු කළ යුතු වුවත් ජනාධිපතිවරයා සහ රජය වගකීමෙන් හා වගවීමෙන් තොරයි.
මේ බහලු‍ම්වලට සම්බන්ධ ව්‍යාපාරිකයන් දුන් තොරතුරු ගැන විශ්වාස බවත් රේගුවෙන් 60%ක් පමණ පරීක්ෂා නොකරන අතර මෙම බහලු‍ම් නිෂ්කාශනයේ බරපතළ ගැටලු රැසක් ඇති වී තිබෙනවා. මෙය හොරකම නැති කරන්න නොව හොරකම බිහි කරන දූෂිතයන්. එම දූෂණ ක්‍රියාවලියෙන් වළක්වා ගැනීම නොව දූෂණයට පෙළඹවීමක්.
බහලු‍ම් පරීක්ෂා කරන උපකරණවලට කෝටි ගණන් වියදම් කළත් ඒවායින් අද 60%ක් බහලු‍ම් පරීක්ෂා නොකරන බව කියවෙනවා. බහලු‍ම්වල අන්තරාදායක දේවල් නොමැති බවට පරීක්ෂා නොකර කියන්නේ කෙසේද? දැන් මෙය දැඩි කතාබහට ලක්ව තිබෙනවා. සමහරු කියන ආකාරයට මේවායේ යුද ආම්පන්න මත්ද්‍රව්‍ය ඇති බවත් මෙවැනි තත්ත්වයක් තුළ පැහැදිලිවම ජාතික ආරක්ෂාවට බරපතළ ගැටලු‍වක්. එම නිසා මාස ගණනාවක් ගතව නිසි පරීක්ෂණයකින් තෙරව මෙම බහලු‍ම් නිදහස් කිරීම ගැන අහක නොබලා විනිවිදභාවයෙන් යුත් අපක්ෂපාතී පරීක්ෂණයක් සිදු කරන ලෙස ඉල්ලා සිටින බවත් මේ ගැන හොරාගේ අම්මගෙන් පේන අහන ක්‍රමයෙන් බැහැර වන ලෙසත් විපක්ෂ නායක සජිත් ප්‍රේමදාස මහතා පැවසීය.
