ප්‍රහාරය යුද අපරාධයක් බවට ඊශ්‍රායලයෙන් චෝදනා
ඊශ්‍රායල – ඉරාන යුද්ධය හත් වැනි දිනයට එළඹෙද්දී ඉරානය විසින් ඊයේ (19දා) එල්ල කරන ලද මිසයිල ප්‍රහාර මාලාවක් හේතුවෙන් දකුණුදිග ඊශ්‍රායලයේ බීර්ෂේබා ප්‍රදේශයේ පිහිටි සොරෝකා රෝහලට දැඩි හානි සිදුව ඇති අතර කිහිප දෙනකු තුවාල ලබා ඇති බව වාර්තා වේ. මෙම ප්‍රහාරයන් යුද අපරාධ ලෙස හඳුන්වා දී ඇති ඊශ්‍රායල ආරක්ෂක ප්‍රධානියා ඉරානයේ උත්තරීතර නායක අයතුල්ලා අලි කුමේණි මෙයට වගකිවයුතු බවට චෝදනා කර තිබේ. මේ අතර ඊශ්‍රායලයේ ස්ථාන හතරක් ඉලක්ක කරගනිමින් මෙම මිසයිල ප්‍රහාරයන් එල්ල කරන ලද්දේ රෝහල අසල පිහිටි හමුදා ගොඩනැඟිලි වෙත මිසක රෝහල වෙත නොවන බව ඉරාන බලධාරීන් පවසා තිබේ.
ඊයේ දිනයේ දකුණු දිග හා මධ්‍යම ඊශ්‍රායලයේ පිහිටි ඉලක්ක වෙත එල්ල කරන ලද ඉරාන ප්‍රහාරයන් හේතුවෙන් 137 දෙනකු තුවාල ලබා රෝහල්ගත කර ඇති අතර ඉන් කිහිපදෙනකුගේ තත්ත්වය බරපතළ බව ඊශ්‍රායල බලධාරීහු පවසති. මේ අතර ඊශ්‍රායල හමුදා විසින් ඉරානයේ අක්‍රීයව පැවති අරක් ජල ප්‍රතික්‍රියාකාරකය හා නටාරිස් න්‍යෂ්ටික පහසුකම වෙත ඊයේ දිනයේ ගුවන් ප්‍රහාර එල්ල කර තිබිණි. මෙම ප්‍රහාරවලින් අවට ප්‍රදේශවලට විකිරණ පැතිරීමේ අවදානමක් නොමැති බව ඉරාන බලධාරීන් විසින් පවසා තිබේ. මේ අතර ඊශ්‍රායලයේ ටෙල් අවිව් අගනුවර ආසන්නයේ පිහිටි ප්‍රදේශවලට ඉරානය විසින් එල්ල කර තිබූ බැලැස්ටික් මිසයිල ප්‍රහාරයන් හේතුවෙන් උසැති ගොඩනැඟිලිවල ජනෙල් වීදුරු ප්‍රහාරය එල්ල වී පැය කිහිපයකට පසුවද කඩා වැටී ඇති බව වාර්තා විය. ඊශ්‍රායලය හා ඉරානය අතර හටගෙන ඇති යුද්ධය හේතුවෙන් ඊශ්‍රායලයේ පිහිටි ඇමෙරිකානු තානාපති කාර්යාලයේ නිලධාරීන් හට කඩිනමින් වෙනත් වාසස්ථානයක් සොයා ගන්නා ලෙස ඇමෙරිකානු බලධාරීන් පවසා ඇති අතර පවතින යුද්ධය හේතුවෙන් එරට සිටින ඇමෙරිකානුවන්හට ගුවන් හා මුහුදු මර්ගවලින් ඇමෙරිකාවට පැමිණෙන ලෙස ඇමෙරිකානු රාජ්‍ය දෙපාර්තමේන්තුව විසින් දැනුම්දී ඇති බව වාර්තා විය.
සංස්කරණය – ඒමන්ති මාරඹේ
